სსიპ ხელოვნების სასახლე - კულტურის ისტორიის მუზეუმი 6900 დოლარად ანდრია დადიანის ნახატების კოლექციიდან მხატვრული ნიმუშის შეძენას და სამშობლოში დაბრუნებას აპირებს. როგორც ცნობილია, პირველი ქართველი პროფესიონალი მოჭადრაკე, ეკატერინე ჭავჭავაძის უმცროსი ვაჟი ანდრია დადიანი თავისი დროის გამოჩენილი კოლექციონერი იყო, რომელიც ჯერ თბილისურ რეზიდენციაში (რომელიც გრაფ ოლდენბურგის საკუთრება გახდა მოგვიანებით) და კიევისეულ სასახლეში ინახებოდა დასავლეთ-ევროპული მხატვრობის საუკეთესო ნიმუშები. 1910 წელს ანდრია დადიანის გარდაცვალების შემდეგ სალომე დადიანმა აღნიშნული ნახატების მნიშვნელოვანი ნაწილი ევროპაში გაყიდა.
უკვე რამდენიმე წელია ხელოვნების სასახლის პროფესიონალთა ჯგუფი ცდილობს არსებული საარქივო მასალების, დადიანების მუზეუმის დამფუძნებლისა და მკვლევარის აკაკი ჭანტურიას აღწერილობების მიხედვით სხვადასხვა მუზეუმსა თუ კერძო კოლექციაში მასალის მოძიებას ამ მხრივ გარკვეული შედეგი მიღწეულია.
ამჯერად ხელოვნების სასახლეს სურს არტ სტუდია Surrey Fine Arts-ის (სურეი ფაინ არტსი) მიერ გასაყიდად გამოტანილი ინგლისის მეფის ჩარლზ I-ის პორტრეტი შეიძინოს. ნამუშევარი ეკუთვნის ნიდერლანდული ხელოვნების აყვავების ხანას - მე-17 საუკუნეს, ე.წ. ოქროს საუკუნეს. ეს არის რეალიზმის ახალი ხედვა, რომელიც გამოვლინდა ყველა ჟანრში, მათ შორის პორტრეტში. ნახატის ავტორი დანიელ მიტენსი მე-17 საუკუნის ერთ ერთ უმნიშვნელოვანეს მხატვრადაა მიჩნეული. ის 1625 წლიდან ის ინგლისის მეფე ჩარლზ I-ის კარის მხატვარი იყო და მას ქონდა პატივი დაეხატა მეფის პორტრეტი. დანიელ მიტენსი ის მხატვარი იყო, რომლის მიერ შესრულებული ავტოპორტრეტი მეფის სასახლეში რუბენსის მიერ შესრულებული ავტოპორტრეტის გვერდით. ამ ბუმბერაზი მხატვრის მიერ შესრულებულ ჩარლზ I-ის პორტრეტს როგორც უდიდესი მხატვრული ღირებულება აქვს უდიდესი ისტორიული ღირებულებაც გააჩნია, როგორც ანდრია დადიანის კოლექციის ექსპონატს.
„ხელოვნების სასახლე, რომელიც 1897-1921 წლებში წარმოადგენდა გრაფ ოლდენბურგისა და აგრაფინა ჯაფარიძის რეზიდენციას თბილისში, ინახავდა დასავლეთ ევროპული ხელოვნების არაერთ ძვირფას ნიმუშს, 1921 წელს ზუგდიდის დადიანების სასახლეების პირველმა დირექტორმა აკაკი ჭანტურიამ აღწერა გრაფ ოლდენბურგის სასახლე, რადგან იმ პერიოდისათვის შენობა უკვე ანდრია დადიანის საკუთრებას წარმოადგენდა. სწორედ ამ აღწერილობების საშუალებით ირკვევა იმ უნიკალური ხელოვნების ნიმუშების შესახებ, რომლებიც საქართველოდან 1921 წელს გაიტანეს და დღეს ევროპის არაერთ კერძო კოლექციაშია განთავსებული.
შესაძენად გამოტანილი ნამუშევარი სწორედ ამ კოლექციის ნაწილს წარმოადგენს. მათი შესყიდვა, მუზეუმში განთავსება და მეცნიერული კვლევის ჩატარება უდიდესი წინგადადგმული ნაბიჯი იქნება როგორც ფონდების უძვირფასესი ხელოვნების ნიმუშების შევსების, ასევე მეცნიერული კვლევის განვითარების საქმეში“, - აღნიშნულია წერილში, რომელიც სასახლის დირექტორმა სახელმწიფო შესყიდვების სააგენტოს ხელმძღვანელს მიწერა, რითაც ნახატების გამარტივებული შესყიდვის ფორმით შეძენის უფლება ითხოვა.