საქართველოს ხელოვნების სასახლე - კულტურის ისტორიის მუზეუმი საფრანგეთის მეფის პირად მანუფაქტურულ სახელოსნოში, გრაფი ოლდენბურგის დაკვეთით მე-19 საუკუნეში დამზადებული გობელენის (კედელზე დასაკიდებელი, ფლამანდიელი ხელოსნების მიერ შალისა და აბრეშუმის ფერადი ძაფებით ხელით ნაქსოვი ხალიჩა-სურათია) შეძენას 6000 ლარად გეგმავს, რომელიც ამ დროისათვის კერძო პირის საკუთრებაშია. აღნიშნული ხალიჩა დამზადებული ერთ ცალად. გობელენი (ფრანგული გობელინი) დეკორატიული ხელოვნების ერთ-ერთი სახეობაა.

როგორც ცნობილია, საქართველოს ხელოვნების სასახლე - კულტურის ისტორიის მუზეუმი განთავსებულია მე-19 საუკუნეში, გრაფ ოლდენბურგის მიერ, სპეციალურად თავისი მომავალი მეუღლის-აგრაფინა ჯაფარიძისათვის აშენებულ სასახლეში. სასახლის აღწერილობიდან ირკვევა, რომ იმ დარბაზის გასაფორმებლად, სადაც შემდეგში მისი მეუღლე აგრაფინა თბილისის უმაღლესი საზოგადოებისთვის მართავდა მუსიკალურ საღამოებს, გრაფმა ოლდენბურგმა სპეციალურად შეუკვეთა გობელენი მანუფაქტურულ სახელოსნოში, რომელიც 1662 წელს საფრანგეთის მეფის ბრძანებით სენ-მარსელში დაარსდა (ეს საწარმო განთავსებული იყო ცნობილი მღებავების – გობელენების (Gobelins) ყოფილი სახელოსნოს შენობაში, საიდანაც მოდის იქ დამზადებული ხელით ნაქსოვი ხალიჩა-სურათების სახელი).

ის დეკორატიულ როლს ასრულებდა ინტერიერში. მასზე ასახულია იმ დროის მაღალი საზოგადოებისთვის დამახასიათებელი სალონური ცხოვრება. გობელენის გამორჩეული ნიშანია კუთხეებში ნაქსოვი სამეფო შროშანები, რაც სწორედ იმ მანუფაქტურული სახელოსნოს ნამუშევრებისთვის იყო დამახასიათებელი. ერთ ოსტატს შეეძლო დაემზადებინა დაახლოებით 1-1,5 მ² (სიმკვრივის მიხედვით) გობელენი წელიწადში, ამიტომ გობელენი ხელმისაწვდომი იყო მხოლოდ მდიდარი მომხმარებლებისთვის და იმ დროსაც უიშვიათეს ხელოვნების ნიმუშს წარმოადგენდა. მისი ფლობა მხოლოდ უმდიდრეს და მაღალი საზოგადოების ოჯახებს ხელეწიფებოდა. საბჭოთა ხელისუფლების პერიოდში, ოლდენბურგები საქართველოდან წავიდნენ და მათი ქონება მიმოიფანტა. მუზეუმის მხრიდან გაწეული უდიდესი საძიებო სამუშაოს ჩატარების შედეგად მოძიებულ იქნა აღნიშნული გობელენი კერძო კოლექციაში. მისი შეძენა და სასახლის იმავე დარბაზში განთავსება, სადაც ის თავდაპირველად იყო, უმნიშვნელოვანესი მიღწევა იქნება ქართული კულტურისა და ისტორიისათვის.