“აუცილებელია, რომ მუზეუმსა და დამთვალიერებლებს შორის მანძილი შემცირდეს, მაშინ როდესაც ახალგაზრდა თაობა ტექნოლოგიებს მიეჯაჭვა, მათ მოსაზიდად რაღაცის მოფიქრება გახდა საჭირო“ - ამბობს ხელოვნების სასახლის გენერალური დირექტორი გიორგი კალანდია რადიო “კომერსანტის“ ეთერში, ლევან კობერიძის საავტორო გადაცემაში “ბრენდი საქართველო“. გიორგი კალანდიამ აღნიშნა, რომ ხელოვნების სასახლე არის ერთადერთი ქართული მუზეუმი, რომელიც Google-ის კულტურის ინსტიტუტის პარტნიორია.

„Google-ს აქვს სპეციალური ინსტიტუტი, რომელიც ყველაზე დიდი კულტურული  გაერთიანებაა და რამდენიმე ათას მუზეუმს, რამდენიმე  ათას  კულტურულ  გაერთიანებას, თეატრს და  ა.შ. აერთიანებს. კავკასიაში წარმოდგენილია აზერბაიჯანი და  საქართველოდან  ერთადერთი მუზეუმი ვართ  ჩვენ. ეს ბევრი თანამედროვე მოვლენის თუ თანამედროვე ტექნოლოგიებით ექსპონატების გაცოცხლების საშუალებას გვაძლევს. ნებისმიერ ადამიანს შეუძლია, რომ ამ აპლიკაციით გადაიღოს სელფი ატვირთოს და პროგრამა მსოფლიოს ინსტიტუტში გაერთიანებული მუზეუმებში და მათ შორის ხელოვნების სასახლეში მოძებნის ისეთ ექსპონატებს, რომელიც გარკვეული პროცენტულობით სელფიზე გამოსახულ ადამიანს ჰგავს.

როგორც  კი  ჩვენ  ამ  ინსტიტუტის  წევრები  გავხდით, ჩვენ სასახლეში უცხოელი ტურისტების რაოდენობამ 100%-ით მოიმატა“, - აღნიშნა გიორგი კალანდიამ.

მისივე თქმით, დამთვალიერებელს რაღაც ისეთი უნდა შესთავაზო, რაც მუზეუმში მოიყვანს, რადგან პირობითად  გუდიაშვილის ნახატების ხილვა და მასზე ინფორმაციის მოგროვება ინტერნეტითაც შესაძლებელია. სწორედ ამიტომ Google-ის კულტურული ინსტიტუტი და მისი წევრობა იყო გამორჩეული.

„ამ ინსტიტუტის წევრობა ადვილი არ არის,  იმისათვის, რომ მისი წევრი გახდე, უნდა გქონდეს  მსოფლიო  შედევრები  და  ეს უნდა  იყოს  არა მარტო ეროვნული მასშტაბის, ეს  უნდა  იყოს  საკაცობრიო მნიშვნელობის. იგივე აფრიკაში მცხოვრები რომ  შევა, მას  უნდა  მოუნდეს  ამ  ნამუშევრის  ნახვა.  პირველი, რაც  შევთავაზე,  ეს იყო პეტრე  ოცხელის  ნამუშევრები  და მოეწონათ და პირველი კოლექცია, რაც  ჩაიტვირთა  Google-ში,  ერქვა – “მარად თანამედროვე“.

თაკო კვაჭანტირაძე