საქართველოს ხელოვნების სასახლე-კულტურის ისტორიის მუზეუმს უდიდესი ქართველი მოდერნისტული თეატრალური მხატვრის, ირაკლი მდივანის 22 გრაფიკული ნამუშევრის შეძენა სურს, რომელიც შესრულებულია ქაღალდზე ფანქრით, აკვარელით და ტუშით. მუზეუმი აღნიშნული ნახატების შეძენას გამარტივებული შესყიდვის საშუალებით ითხოვს. 22 ნამუშევარში კი მუზეუმი 19000 ლარის გადახდას აპირებს.

ირაკლი მდივანი წლების განმავლობაში მუშაობდა როგორც თოჯინების თეატრის მთავარ მხატვრად, ასევე საქართველოს სხვადასხვა თეატრების მხატვრად. პარალელურად ახდენდა წიგნების ილუსტრაციას.

მუზეუმის გენერალური დირექტორის გიორგი კალანდიას განმარტებით, შესაძენი ნახატები ძირითადად მოდერნისტული ხასიათისაა და უდიდესი მხატვრული და ისტორიული ღირებულება აქვს.

„დღეისათვის მხატვრის შესახებ არც გუგლის საძიებო სისტემაში, არც სხვადასხვა წყაროებში არანაირი ინფორმაცია არ იძებნება. ჩვენი მუზეუმი ირაკლი მდივნის ნამუშევრების მცირე ნაწილს ინახავს და ამ ბუმბერაზი მხატვრის შემოქმედების სრულად წარმოდგენისთვის, მისი სახელის და შემოქმედების ფართო საზოგადოებისთვის გაცნობისა და პოპულარიზაციის მიზნით საშური საქმეა აღნიშნული კოლექციის შეძენა. ყოველივე ამის გათვალისწინებით აღნიშნული ნამუშევრების შეძენა ჩვენი მუზეუმისთვის უმნიშვნელოვანესი გამოწვევაა“, - აღნიშნულია წერილში, რომელიც გიორგი კალანდიამ სახელმწიფო შესყიდვების სააგენტოს დირექტორს გაუგზავნა და აღნიშნული ნახატების გამარტივებული შესყიდვის საშუალებით შეძენის უფლება ითხოვა.