რა პროცესები მიმდინარეობს შრომით ბაზარზე და რა იწვევს კვალიფიციური კადრების მწვავე დეფიციტს, ამის შესახებ რადიო კომერსანტის ეთერში HR- პროფესიონალთა გილდიის - აღმასრულებელმა დირექტორმა ლილი ბიბილაშვილმა ისაუბრა.
ლილი ბიბილაშვილის თქმით, კადრების დეფიციტი მხოლოდ საქართველოსთვის დამახასიათებელი ტენდენცია არაა და მსგავსი სურათია სხვა ქვეყნებშიც, თუმცა სხვადასხვა ადგილობრივი მიზეზებით.
„ზოგად ტენდენციები არის შემდეგი, ტექნოლოგიების განვითარების შედეგად მაღალი კვალიფიკაციის ადამიანებს შესაძლებლობა ეძლევათ, რომ დასაქმდნენ სხვა ქვეყნებში და არ შეიცვალონ გეოგრაფიული ადგილმდებარეობა. ამან ადგილობრივი შრომის ბაზარს „წაართვა“ პერსონალი, მეორე მიზეზი ეხება მიგრაციას - ადვილი გახდა გადაადგილება ქვეყნებს შორის, ეს არაა ცუდი თუ ადამიანები უკეთეს დასაქმებას შეძლებენ.
მინდა ვთქვა, რომ ადგილობრივი შრომის ბაზარზე არის პრობლემა პროფესიონალების და განათლების სისტემასაც აქვს საფიქრალი. როგორც ყოველთვის არის აცდენა მოთხოვნასა და მიწოდებას შორის. მაგალითად დიდი დეფიციტია სუპერმარკეტების კონსულტანტებთან დაკავშირებით და შრომის ბაზარზე არსებული კონკურენციის გამო 2-2,5-ჯერ გაიზარდა მათი ხელფასი,“- განაცხადა ლილი ბიბილაშვილმა.
მისი თქმით, შრომით ბაზარზე გამოჩნდა ახალი თაობა, რომელიც გაცილებით მრავალფუნქციურია და სწორედ ასეთი მრავალფუნქციურ კადრებზეა მოთხოვნა.
„შრომის ბაზარზე გაჩნდა ახალი Z თაობა, რაოდენობრივად ჯერჯერობით ბევრი არ არიან და საწყის პოზიციებზე არიან წარმოდგენილი, მაგრამ მათი თაობისთვის დამახასიათებელია მისწრაფება, რომ ისეთ კომპანიებში დასაქმდნენ სადაც მათ ექნებათ განვითარებისა და კარიერული წინსვლის შესაძლებლობა. კარიერული წინსვლა ამ თაობისთვის არ ნიშნავს მხოლოდ ვერტიკალურ წინსვლას, არამედ ჰორიზონტალურსაც, რაც მათ უნარებს გახდის მრავალფუნქციურს.
დღეს მსოფლიო ბაზარზე სწორედ ასეთი მრავალფუნქციურ კადრებზეა მოთხოვნა. ჩვენ ვცხოვრობთ გლობალიზაციის და ტექნოლოგიური განვითარების ეპოქაში, რომელიც გამოირჩევა ტურბულენტობით და არაპროგნოზირებადობით, სწრაფი ცვლით. ეს სისწრაფე მოითხოვს იმ უნარების წარმოდგენას, რომელიც სჭირდება სწრაფ ადაპტაციას, ეს არის სწრაფად ათვისების უნარი, კრიტიკული აზროვნება, კრეატიულობა და ა.შ. ძალიან ბევრი კომპონენტია, რომლის გათვალისწინებაც აუცილებელია შრომით ბაზარზე წარმოდგენილი სამივე მოთამაშისთვის, ესენი არიან დამსაქმებლები, სამუშაოს მაძიებლები და სახელმწიფო, რათა მოხერხდეს და მინიმალური დანაკარგებით შესაძლებელი გახდეს შრომით ბაზარზე არსებული სიტუაციის გაუმჯობესება და გაჯანსაღება,“- განაცხადა ლილი ბიბილაშვილმა.
ლილი ბიბილაშვილი მიიჩნევს, რომ დამსაქმებელმაც, სამუშაოს მაძიებლებმაც და სახელმწიფომაც ნაბიჯი უნდა აუწყონ იმ ტემპს, რომელიც მსოფლიო ბაზარზეა. ამ კონტექსტში კი ის განათლების სფეროს უფრო მოქნილობაზე ამახვილებს ყურადღებას.
„თუ გაუმჯობესება ხდება განათლების მიმართულებით შრომის ბაზარი გაცილებით სწრაფ ცვლილებებს განიცდის, უფრო მეტს ითხოვს და აქ ტემპების აცდენაა, რაც შეეხება უმაღლეს განათლებას, აქაც საინტერესო ცვლილებებია მოსალოდნელი, ამ პერიოდში, როდესაც ხელოვნური ინტელექტი სერიოზულ კონკურენციას უწევს ადამიანებს, სრულიად განსხვავებული უნარების მქონე პერსონალს მოითხოვს შრომის ბაზარი. მრავალფუნქციური თანამშრომელი ესაჭიროება დღეს მსოფლიოს და ის საკითხები, რომელიც დღეს პრობლემადაა წარმოდგენილი შრომის ბაზარზე, სინამდვილეში გამოწვევაა,“- აღნიშნა ლილი ბიბილაშვილმა.