რუსი სამხედროების კონტროლის ქვეშ მყოფი ხერსონის ოლქის ადმინისტრაციის ახლად დანიშნულმა ხელმძღვანელმა, ვლადიმერ სალდომ განაცხადა, რომ რეგიონში ფუნქციონირებას დაიწყებს ოკუპირებული სამხრეთ ოსეთის საერთაშორისო საანგარიშო ბანკი. ამ ბანკის ფილიალები უკვე ფუნქციონირებს ე. წ. დონეცკისა და ლუგანსკის სახალხო რესპუბლიკებში.

 ამის შესახებ სალდომ დანიშვნის შემდეგ პირველ ბრიფინგზე განაცხადა და მას ციტირებს რია ნოვოსტი.

„უახლოეს მომავალში შეიქმნება ბანკი <...> რომელიც განახორციელებს ნაღდი და ნაღდი ფულის ანგარიშსწორებას. ეს იქნება MRB Bank, International Settlement Bank“, - განაცხადა სალდომ.

მისი თქმით, ბანკს აქვს მუშაობის ნებართვა.

ვლადიმერ სალდოს ინფორმაციით,  ჯამში რეგიონში 200-მდე ფილიალის გახსნა იგეგმება. ბანკი ადგილობრივ მოსახლეობას დაასაქმებს.

სალდომ ასევე განაცხადა, რომ რეგიონში კომუნიკაციისა და განათლებისთვის იგეგმება ორი ენის გამოყენება: რუსული და უკრაინული.

ე.წ. დონეცკის სახალხო რესპუბლიკაში  საერთაშორისო საანგარიშსწორებო ბანკმა 2018 წლის ოქტომბერში მიიღო საქმიანობის ლიცენზია. მას უფლება აქვს რეგიონში გახსნას და აწარმოოს კლიენტების მიმდინარე ანგარიშები და გასცეს გადახდის დოკუმენტები, ბარათები და მათი ტექნიკური მომსახურება.

ბანკის წარმომადგენლობა ე.წ. ლუგანსკის სახალხო რესპუბლიკაში  2015 წლიდან ფუნქციონირებს.

ბანკის სათაო ოფისის ვებგვერდზე აღნიშნულია, რომ კომერციული ბანკი „საერთაშორისო საანგარიშსწორებო ბანკი“ არის „უნივერსალური საკრედიტო ინსტიტუტი, რომელიც 2015 წლიდან მუშაობს სამხრეთ ოსეთის რესპუბლიკის ფინანსური მომსახურების ბაზარზე“.

შეგახსენებთ, 28 აპრილს, ხერსონის ოლქის სამხედრო-სამოქალაქო ადმინისტრაციის უფროსის მოადგილემ კირილ სტრემუსოვმა განაცხადა, რომ რეგიონი 1 მაისიდან რუბლის ზონაში გადადის. მისი თქმით, გარდამავალ პერიოდს ოთხ თვემდე დასჭირდება, ამ დროის განმავლობაში რეგიონში რუბლი და გრივნა პარალელურ რეჟიმში იბრუნებს.

უკრაინის ხერსონის ოლქი ესაზღვრება ყირიმს. რუსეთის თავდაცვის სამინისტრომ ხერსონის სრული კონტროლის ქვეშ აღების შესახებ 2 მარტს განაცხადა. 15 მარტს რუსეთის შეიარაღებულმა ძალებმა სრული კონტროლი აიღეს ხერსონის ოლქის მთელ ტერიტორიაზე.

ათი დღის შემდეგ ყირიმის მუდმივმა წარმომადგენელმა რუსეთის პრეზიდენტთან, რეგიონის ვიცე-პრემიერმა გეორგი მურადოვმა განაცხადა, რომ დაიწყო ახალი სამხედრო-სამოქალაქო ადმინისტრაციების ფორმირება ხერსონის ოლქში და უკრაინის ზაპოროჟიეს ოლქის სამხრეთით, რომელსაც აკონტროლებენ რუსეთის სამხედრო ძალები.

რუსეთი უკრაინაში  24 თებერვალს შეიჭრა.