ხევსურეთის მაცხოვრებლების ნაწილი აცხადებს, რომ ზამთრის პირობებში უშუქოდ არიან დარჩენილი და ჰესი, რომელიც მათი  ელექტროენერგიით უზრუნველყოფისთვის აშენდა, სათანადოდ ვერ მუშაობს.

ხევსურეთს ელექტროენერგია „ბიტეხი 1“-ის ჰიდროელექტროსადგურიდან მიეწოდება, ჰესის  მშენებლობა 2020 წელს დასრულდა, პროექტი „პარვუს ჰიდრომ“ განახორციელა, რაშიც სახელმწიფომ  3 მილიონ ლარზე მეტი გადაიხადა.

ადგილობრივები ნაწილი მედიასთან აცხადებს, რომ ჰესი, რომლის აშენებაშიც მილიონობით ლარი დაიხარჯა, არასათანადოდ მუშაობს, მილები გაჭედილია და  სოფლები კვლავ უშუქოდაა დარჩენილი.

ბრალდებას უარყოფენ „პარვუს ჯგუფში“. როგორც  „კომერსანტს“ განუცხადეს, ჰესი მათ მიერ აშენდა თუმცა მის მართვაში სხვა ოპერატორი კომპანია შევიდა. კომპანიის დირექტორი სულხან ზუმბულიძე, რომელიც ბრალდებების ერთ-ერთი მთავარი ადრესატია, ამბობს რომ ჰესი გამართულად მუშაობს. ერთ-ერთ სოფელში უშუქობა კი ხაზების პრობლემას უკავშირდება.

„რაც მე ვიცი ჰესი არის ჩართული და მუშაობს. რა მოხმარებაც არსებობს იქ, მას აკმაყოფილებს. ჩვენ ამ ჰესის ოპერატორები არ ვართ, მხოლოდ ავაშენეთ, მაგრამ ცხადია დავინტერესდით. ჰესი გამართულად მუშაობს, ადგილობრივ მოსახლეობასაც ველაპარაკეთ და მოხმარება რაც არის, იმას აბალანსებს. იქ არის ერთი სოფელი, სადაც ხაზი არის გათიშული და ამიტომ ეს მოსახლე ჩივის“, - განაცხადა სულხან ზუმბურიძემ.

უშუქობის პრობლემას უარყოფს დუშეთის მუნიციპალიტეტის მერიც. როგორც განუცხადა „კომერსანტს“ მანანა ნარიმანიძემ განუცხადა, პრობლემურ ადგილზე  ელექტრიკოსები გასულ კვირას იყვნენ ჩასულები და ელექტროენერგია აღადგინეს.

ელექტრიკოსები ჩასულები იყვნენ ადგილზე გასული კვირის ხუთშაბათს, ამღას და ახიელს ელექტროენერგია მაშინვე აღუდგინეს, - განაცხადა მანანა ნარიმანიძემ. რაც შეეხება სოფელ ჭიმღას, მისი განმარტებით, იქ ერთი მოსახლე ცხოვრობს, რომელსაც მზის ბატარეები აქვს.

„ბიტეხი 1“-ის ჰიდროელექტროსადგურის ამშენებელი კომპანიის  “პარვუს ჯგუფის“ მიერ განხორციელებულ მშენებლობებთან დაკავშირებით კითხვები აქვთ  ანტიკორუფციულ მოძრაობაში. არასამთავრობო ორგანიზაციაში მიიჩნევენ, რომ  “პარვუს ჯგუფის“ სახელმწიფო შესყიდვებში მონაწილეობა, მისი მენეჯმენტიდან გამომდინარე გარკვეულ ეჭვებს ბადებს.

„გადასახადების გადამხდელების მიერ შევსებული ბიუჯეტიდან გამოიყო 4 მლნ-მდე ლარი, რომ არხოტის ხეობაში აშენებულიყო ჰესი. ფაქტი სახეზეა, რომ ახოტის ხეობაში ადგილობრივ მოსახლეობას ელექტროენერგია კვლავ არ მიეწოდება. არსებობენ ადამიანები, რომლებიც ამას საჯაროდ აცხადებენ და სახელმწიფო სტრუქტურების მხრიდან რეაგირება არაა.

ჰესის  კონტაქტი არ იყო ტენდერის საფუძველზე მიღებული, იყო პირდაპირი ხელშეკრულების გაფორმების მეშვეობით და იმავდროულად, კომპანია კავშირშია ყოფილ მაღალჩინოსნებთან, ამიტომ არსებობს საფუძვლიანი ეჭვი, რომ ადგილი ჰქონდეს კორუფციულ გარიგებას, ან ინტერესთა შეუთავსებლობას.

ჩვენი აზრით, ამ საკითხს სჭირდება  გამოძიება და გამოძიებამ უნდა დაადგინოს ნამდვილად არის თუ არა, ამ საქმეში ინტერესთა შეუთავსებლობა. ერთი იმიტომ, რომ საქმე ეხება ყოფილ მაღალჩინოსანს, რომელიც ახლა წარმოადგენს კერძო სექტორს და იმავდროულად არის სახელმწიფო დაკვეთების ერთ-ერთი მსხვილი ბენეფიციარი და მეორე მხრივ, გასარკვევია, შესრულებული სამუშაოები რამდენად კეთილსინდისიერად არის განხორციელებული და დამკვეთმა სახელმწიფო სტრუქტურებმა ეს ობიექტი როცა ჩაიბარეს, ადგილი ხომ არ ჰქონდა თანამდებობის პირების მხრიდან გულგრილობას“, - აცხადებს ანტიკორუფციულ მოძრაობის ერთ-ერთი ლიდერი ვასო ურუშაძე.

მისივე თქმით, ანტიკორუფციულ მოძრაობაში მიმდინარეობს ამ კომპანიის მიერ მიღებული სახელმწიფო შესყიდვების და განხორციელებული პროექტების შესწავლა.