ხილისა და ბოსტნეულის შესანახი სამაცივრე კომპლექსი ,,აგროლიდერი“ კასპის მუნიციპალიტეტში ერთ-ერთი ყველაზე მსხვილი საწარმოა, რომელიც ადგილობრივ ფერმერებს მოსავლის დაბინავებაში ეხმარება. მიმდინარე სეზონზე მან 600 ტონა ვაშლი ჩაიბარა. თუმცა მოთხოვნა გაცილებით მეტი იყო, რის გამოც ფერმერების უმეტესობას პროდუქტის შენახვა არც უცდია და ვაშლი დაკრეფისთანავე გაყიდა.
,,აგროლიდერი“ სოფლის განვითარების სააგენტოს პროგრამის ,,ერთიანი აგროკრედიტის“ ბენეფიციარია. საწარმოს ხელმძღვანელი ლევან ექოზაშვილი ,,კომერსანტთან“ აღნიშნავს, რომ არსებული შემნახველი ინფრასტრუქტურა მოთხოვნას ვერ პასუხობს, რის გათვალისწინებითაც მათ ახალი, რიგით მეორე სამაცივრე მეურნეობა წამოიწყეს, რომლის მშენებლობაც თითქმის დასრულებულია. ახალი საწარმოს ტევადობა 750 000 ტონაა. შეკვეთებს მომავალი წლიდან მიიღებს.
,,სასოფლო-სამეურნეო ტექნიკის შეძენაში სახელმწიფო საგრანტო პროგრამა დაგვეხმარა. მიმაჩნია, რომ განსაკუთრებული მნიშვნელობა აქვს საოკუპაციო ხაზთან წარმატებული ფერმერული მეურნეობების არსებობას და სახელმწიფო მხარდაჭერა ამ მხრივ ძალიან მნიშვნელოვანია. ერთი პროექტი უკვე დავასრულეთ. პლუს მაცივრებში (მხოლოდ ხილბოსტნეული ინახება) წელს შევინახეთ დაახლოებით 600 ტონა ვაშლი, რომლის ნახევარი ექსპორტზეა გასული. მეორე პროექტის მშენებლობა მიმდინარეობს, ძირითადი სამუშაოები უკვე შესრულებულია. ტექნიკა-დანადგარის მონტაჟს თურქი სპეციალისტები მოახდენენ. ეს არის ე.წ. მინუს მაცივრები, სადაც ნებისმიერი კენკროვანის შენახვა შეიძლება. მიუხედავად იმისა, რომ სამაცივრე და შესანახი მეურნეობის მიმართ ინტერესი გაზრდილია, რაც გაკეთდა ჯერჯერობით საკმარისი არ არის. ბევრ ფერმერს 50-60 ტონა ვაშლის შენახვა უნდოდა და ვერ მოახერხა, რის გამოც იძულებული გახდა, რომ ხილი სეზონზევე, იაფად გაეყიდა. ახალი კომპლექსი 750 ტონა მოსავალს შეინახავს, რაც პროდუქტის შენახვის პრობლემას მნიშვნელოვნად მოაგვარებს“, - ამბობს ,,კომერსანტთან“ ლევან ექოზაშვილი.
შემნახველი და სამაცივრე მეურნეობებში ერთ-ერთ პრობლემად მეწარმე მაღალ გადასახადს მიიჩნევს. შესაბამისად, იგი ცდილობს ელექტროენერგიის ჩანაცვლებას ენერგოეფექტური საშუალებებით, როგორიცაა მზის პანელები. აღნიშნულთან დაკავშირებით კონსულტაციები თურქი სპეციალისტებისგან მიიღეს და საჭირო ტექნიკას დაახლოებით 2-3 წელიწადში დაამონტაჟებენ.
ცნობისთვის, „ერთიანი აგროპროექტის“ ფარგლებში სასოფლო-სამეურნეო კოოპერატივმა „აგროლიდერი“ 600 ტონა ხილის და ბოსტნეულის შესანახი სამაცივრო კომპლექსი 4 წლის წინ ააშენა. საინვესტიციო ხარჯიდან 328 000 ლარი ,,იაფი კრედიტი“, ხოლო 580 000 ლარი ,,ერთიანი აგროპროექტის“ გრანტია.
რაც შეეხება ახალი სამაცივრე მეურნეობის კომპლექსს, პროექტის განხორციელებისთვის 500 000 ლარი სახელმწიფოს დახმარებაა, ,,იაფი კრედიტის“ ფარგლებში ბენეფიციარმა 600 000 ლარზე მეტი მიიღო.
ლევან ექოზაშვილი ფიქრობს, რომ 2 სამაცივრე მეურნეობა ფცის და მიმდებარე სოფლების ფერმერების უმრავლესობას მოსავლის დაბინავების პრობლემას მოუხსნის.
მარი ჩიტაია