რუსეთ-უკრაინის ომის გამო ,,ხომლის მარნის“  გეგმები გლობალურ ბაზრებზე შეიცვალა.  ლონდონის პრესტიჟულ მაღაზიაში მოხვედრის შემდეგ ყველაზე ძვირადღირებული ქართული ღვინო, უკრაინაში, ამერიკის შეერთებულ შტატებსა და სკანდინავიის ქვეყნებშიც უნდა გაყიდულიყო, მაგრამ ყველა ახალი პროექტი შეჩერდა. როგორც ,,ხომლის მარნის“ დამფუძნებელი თამაზ ომანაძე ,,კომერსანტთან“ ამბობს,  ამ ეტაპზე ,,ხომლის უსახელოური“ მხოლოდ დიდ ბრიტანეთში გადის, სადაც მაღაზია Hedonism Wines-ის რჩეული ღვინოების სიაშია.

მიიღე ინფორმაცია უფრო სწრაფად ჩვენს Telegram-ზე.

,,დიდ ბრიტანეთში მარკეტინგის მიმართულებით მიდის აქტიური მუშაობა, რათა ღვინის მოყვარულთა მაღალ სეგმენტში ქართული ღვინო უფრო ცნობადი და მოთხოვნადი გახდეს. საქართველოს მეღვინეობის შესახებ აქტიური საიმიჯო კამპანია მიმდინარეობს, რაც სამომავლოდ გაყიდვებზეც აისახება. ამ ეტაპზე მთავარი გამოწვევაა, რომ ლონდონის ბაზარზე კუთვნილი ნიშა დავიკავოთ. პარალელურად ვმუშაობთ ამერიკის  და კანადის ბაზრებზეც, მაგრამ ომი და ლოგისტიკასთან დაკავშირებული გლობალური  პრობლემის მოგვარება დიდ გამოწვევად რჩება.  უკრაინის ბაზარზე ექსპორტისთვის ვემზადებოდით, შეთანხმება თითქმის მიღწეული იყო, მაგრამ გავჩერდით. მთავარია, უკრაინელ ხალხს მშვიდობა ჰქონდეს, ბიზნესზე ამ მიმართულებით უკვე ვერც ვიფიქრებთ.  თავიდან კოვიდმა შეგვიშალა ხელი, ახლა ფინანსურმა კრიზისმა, ომი ბოლო წერტილი აღმოჩნდა. გვინდა იაპონიის ბაზარზე გასვლა, პრიორიტეტად რჩება ასევე  კანადა, ამერიკა და ევროპა. მაგრამ დამოუკიდებლად ეს ძალიან რთულია, მინიმუმ, გამოფენებში უნდა ვიღებდე მონაწილეობას, რაც დიდ ფინანსებთანაა დაკავშირებული, ხოლო მთავრობის მხრიდან ხელშეწყობა მინიმალურ დონეზეც არ გვაქვს“, - აცხადებს თამაზ ომანაძე ,,კომერსანტთან“.

,,ხომლის მარნის“ მიერ წარმოებული ღვინო კონკრეტულ სეგმენტზეა გათვლილი და იყიდება მცირე რაოდენობით, ექსკლუზიურად VIP სტუმრებსა და კოლექციონერებზე.

ომანაძის ინფორმაციით, „ხომლის უსახელოური“ დიდ ბრიტანეთში 900 გირვანქა სტერლინგად იყიდება. აშშ-სა და სკანდინავიის ქვეყნებში ფასი დაახლოებით 500-600 დოლარი იქნება. 

მცირე რაოდენობით ,,ხომლის უსახელოური“ იყიდება ადგილობრივ ბაზარზეც, სადაც მისი შეძენა სულ რამდენიმე ობიექტშია შესაძლებელი: ,,8000 მოსავალი“, ,,ღვინის გალერეა“ და ,,მარიოტი“.

საქართველოში ,,ხომლის უსახელოურის“ ფასი 830 ლარს შეადგენს.

ღვინის მწარმოებელი კომპანია ,,ხომლის მარანი“ 2010 წელს დაარსდა. კომპანია აწარმოებს ბიო/ორგანულ ქვევრის ღვინოებს უძველესი ქართული ტრადიციული მეთოდებით. ვენახები გაშენებულია ხვამლის მთის ფერდობზე, რომელიც ტექნიკის გარეშე, მხოლოდ ხელით მუშავდება.

მარი ჩიტაია