გარემოს დაცვისა და სოფლის მეურნეობის სამინისტროში კერძო  სექტორთან შეხვედრა გუშინ, 21 მარტს ისე დასრულდა, რომ ბიზნესმა ხორბლის სუბსიდიასთან დაკავშირებით პასუხი ვერ მიიღო. შესაბამისად, უცნობია, წელს რა ნაწილს დაასუბსიდირებს მთავრობა და რეალურად რა ღონისძიებები გატარდება, რის საფუძველზეც პურის ფასი უნდა შენარჩუნდეს.

მიიღე ინფორმაცია უფრო სწრაფად ჩვენს Telegram-ზე.

,,ხორბლისა და ფქვილის მწარმოებელთა“ ასოციაციის დირექტორის ლევან სილაგავას განცხადებით, სუბსიდიის პრინციპი ცნობილია, მაგრამ პირობებზე ბიზნესმა არაფერი იცის, რაც იმპორტთან და ფასებთან დაკავშირებით გაუგებრობას იწვევს.

,,რეალურად ვერ მივხვდი, რატომ არ მოხდა ამ საკითხის განხილვა. ხორბალი ძვირდება და სუბსიდიის მექანიზმის ჩართვა აუცილებელი ხდება. ასეთ დროს ჩვენ არ ვიცით არაფერი. ხორბალს თუ დაუწესდება სუბსიდია, წესით, კომპანიამ უნდა შემოიტანოს სუბსიდირებით და ბაზარს მიაწოდოს იმ ფასად, რაც წარმოებისთვის მისაღებია. ჩვენ მომხმრე ვართ, პირდაპირ პურის სუბსიდია მოახდინონ, ბევრი გაუგებრობა ახლავს ამ ამბავს, რატომღაც მიაჩნიათ, რომ ეს არის საჩუქარი წისქვილებისთვის, მაგრამ სინამდვილეში მათ არანაირ შეღავათს  არ აძლევს. პირობითად, შემოვიტანთ 400 დოლარად და, სიტყვაზე, გაიყიდება 80 ლარად, რაღაც ნაწილს მთავრობა დაასუბსიდირებს, ჩვენთვის ამით არაფერი იცვლება, არც მოგების მარჟას ზრდის. სხვაობა სინამდვილეში მომხმარებელს უფინანსდება.

ჩვენ ვამბობდით, რომ მიგვეღო სარკისებური გადასახადი და ლამის მტრებად გამოგვაცხადეს. ამას ვამბობდით იმიტომ, რომ ყოფილიყო მარაგი და მეტად სტაბილური სიტუაცია გვქონოდა. თავისი ბიზნესიდან გამომდინარე, პურის მწარმოებლებმა დააჯერეს მთავრობა, რომ ფქვილის იმპორტი კარგია, რუსეთიდან შემოდის და იაფია. მთავრობამაც მათი პოზიცია გაითვალისწინა და აქამდეც მივედით. ახლა უკვე სუბსიდირების გარდა სხვა გამოსავალი არ არის“, - ამბობს ,,კომერსანტთან“ ლევან სილაგავა.

მისი თქმით, 2 კვირაში ხორბალი გლობალურ ბაზრებზე 100 დოლარით არის გაძვირებულია, რაც წარმოებისთვის დიდი პრობლემაა და სუბსიდიის მექანიზმის აუცილებელ ჩართვას მოითხოვს.

,,საკმაოდ დიდი ფასებია, 450 დოლარს მიაღწია 1 ტონა ხორბლის ღირებულებამ ბაზრებზე. ჩვენი პოზიცია იყო, რომ სჯობს, ფასებს მივყვეთ ნელნელა. ახლა ისე მოხდა, რომ შემოდიოდა მხოლოდ ფქვილი დაბალ ფასად, მაგრამ რადგან მარაგი არ იყო, საშუალო შეწონილი ფასითაც ნელ-ნელა ვერ გადავდიოდით.  ამასობაში 2 კვირაში ხორბალი  100 დოლარით გაძვირდა. შესაბამისად, ბაზრისთვის ამას დარტყმის ეფექტი აქვს და მივიღეთ ისეთი მოცემულობა, როცა ფქვილის იმპორტმა ხორბლის იმპორტი გააჩერა. პრიორიტეტი ხორბლის მარაგი უნდა ყოფილიყო. საჭიროა ისეთი ტენდერი, რომელიც პარამეტრებს განსაზღვრავს იმგვარად, რომ ბაზრისთვის ფქვილის მიწოდება 68 ლარად გახდეს შესაძლებელი. პრინციპი ვიცით, პირობები - არა, რის გარეშეც ტენდერში ვერ შევალთ, ამიტომ გაურკვევლობაში ვართ“, - აცხადებს ლევან სილაგავა ,,კომერსანტთან“.

„საქსტატის“ მონაცემებით,მიმდინარე წლის თებერვალში, გასული წლის ანალოგიურ პერიოდთან  შედარებით, ხორბლის პურის ფასი საქართველოში 22.3%-ით გაიზარდა. ამავე პერიოდში 20.7%-ით არის გაზრდილი ფქვილის ფასიც.

როგორც აღინიშნა, სუბსიდიასთან დაკავშირებით დეტალებზე  მთავრობის წარმომადგენლები ჯერჯერობით არ საუბრობენ.

სოფლის მეურნეობის მინისტრის ოთარ შამუგიას განცხადებით, ხორბლის და ფქვილის მარაგები ქვეყანას საკმარისი აქვს. ასევე პირველადი მოხმარების  პროდუქტები შეფერხების გარეშე შემოდის და  ქვეყანას ამ მიმართულებით საფრთხე არ ემუქრება.

მარი ჩიტაია