ქვეყნის სასურსათო უსაფრთხოებას ფქვილისა და ხორბლის ნაწილში საფრთხე არ ემუქრება - ამის შესახებ ,,ბიზნესპრესნიუსს“ გარემოს დაცვისა და სოფლის მეურნეობის მინისტრის მოადგილემ გიორგი ხანიშვილმა განუცხადა.

მისი თქმით, თუ რუსეთიდან ხორბლის შემოტანა შეიზღუდა, საქართველო ხორბალს ევროპაში იყიდის.

„ყველაფერი ლოგიკურადაა. FAO-ს სტანდარტების მიხედვით, ხორბლის გარდამავალი ნაშთი ქვეყანაში სასურველია იყოს მთლიანი მოხმარების 12%-ის ფარგლებში. იმ შემთხვევაში როცა, 5-6 თვეა ჩვენთან ფქვილის ხვედრითი წილი იზრდება და მიაღწია 13-14 ათას ტონას, წინა თვეში კი 16 ათასი ტონა შემოვიდა. ეს არის დაახლოებით 30 ათასი ტონა ხორბლის ექვივალენტი. ამავე დროს, შემოდის დაახლოებით 12 ათასი ტონა ხორბალიც, ეს კი ერთად ქმნის 12%-ს. იმის გამო, რომ წისქვილები გაჩერებული არიან და ვეღარ აწარმოებენ იმ რაოდენობის ფქვილს, რასაც აქამდე, ამის გამო ხორბალში მარაგი აბალანსებს ნაშთს. თუ ჩვენ გვექნება მოცემულობა, რომ შემცირდება ფქვილის მარაგი, ბუნებრივია, გაიზრდება ხორბლის მარაგი.

ახლა ეს მოცემულობაა და კარგად უნდა ავუხსნათ მოსახლეობას, რომ ამ ნაწილში სასურსათო უსაფრთხოების კუთხით პრობლემები არ გვაქვს და არც გვექნება. რუსული ბაზრის დაკეტვის შემთხვევაში კი, ჩვენ ხორბალს შემოვიტანთ ევროპიდან“, - განაცხადა ხანიშვილმა.

მინისტრის მოადგილემ, ასევე ისაუბრა იმაზე, თუ რას გეგმავს მთავრობა რუსეთში ხორბალზე დაწესებული მცურავი საბაჟო გადასახადის დასაბალანსებლად.

„სექტორთან საუბარია არა მხოლოდ სუბსიდირებაზე, არამედ სარკისებურ დაბეგვრაზეც, როგორც ამას წისქვილები უწოდებენ. ანუ, სხვაობა იმპორტირებულ ფქვილსა და გადასამუშავებელ ხორბალს შორის რაც არის რუსეთში არსებული ექსპორტის გადასახადის გამო, მის დაბალანსებაზეა საუბარი. ერთის მხრივ, ხორბალზე სუბსიდირებით, მეორეს მხრივ კი, ფქვილზე შესაბამისი განაწესის დამატებით, რომ დავიჭიროთ სწორი ბალანსი და არ მოხდეს პურის გაძვირება. ეს სქემა შევთავაზეთ, მაგრამ წისქვილებმა დააყენეს საკითხი ცოტა სხვანაირად. მათი პოზიციაა, რომ მხოლოდ ფქვილზე დაწესდეს გადასახადი ორივე მდგენელიდან გამომდინარე. რასაც ვფიქრობთ, რომ არალოგიკურია ჩვენი სამინისტროს პოზიციით, თუმცა ველოდებით ფინანსთა და ეკონომიკის სამინისტროდანაც პოზიციების დაფიქსირებას“, - აცხადებს გელა ხანიშვილი ,,ბიზნესპრესნიუსთან“.

ინფორმაციისთვის, მიმდინარე წლის იანვარში, გასული წლის დეკემბერთან შედარებით, ხორბლის იმპორტი საქართველომ 17%-ით, 11.8 ათას ტონამდე შეამცირა. იმავე პერიოდში ფქვილის იმპორტი 8.5%-ით, 8.9 ათას ტონამდე გაიზარდა.

BPN.GE