საქართველოს კულტურის, სპორტისა და ახალგაზრდობის სამინისტრო ხვიჩა კვარაცხელიას მხარდაჭერას უცხადებს და განმარტავს, რომ ცნობილი ფეხბურთელის მიმართ ნეგატიური კამპანიის წარმოება დაიწყო, რაც ყოვლად მიუღებელია.
„სპორტის სამინისტრო ხვიჩა კვარაცხელიას სრულ მხარდაჭერას უცხადებს საქართველოს ნაკრებისა და ,,ნაპოლის'' ფეხბურთელის, ხვიჩა კვარაცხელიას მიმართ, გარკვეული დაჯგუფების მხრიდან, მიმდინარეობს ნეგატიური კამპანია.
საქართველოს კულტურის, სპორტისა და ახალგაზრდობის სამინისტროსთვის მიუღებელია სპორტსმენის მიმართ მსგავსი თავდასხმები.
ჩვენ ხვიჩა კვარაცხელიას დიდ წარმატებებს ვუსურვებთ და სრულ მხარდაჭერას ვუცხადებთ“, — აღნიშნულია სამინისტროს განცხადებაში.
რატომ დაიწყო ფეხბურთელის მიმართ ნეგატიური კამპანიის წარმოება?
ხვიჩა კვარაცხელიამ ცოტა ხნის წინ პრესკონფერენციაზე ჟურნალისტების კითხვებს უპასუხა, სადაც ერთ-ერთ კითხვა/პასუხი, საქართველოში განხილვის თემა გახდა.
ჟურნალისტის კითხვაზე, „რატომ დატოვე რუსეთი?“ - კვარაცხელია პასუხობს:
„ვფიქრობ, ეს ცოტა რთული საკითხია, უფრო პოლიტიკური შეკითხვაა. იმიტომ დავტოვე რუსეთი, რომ საჭიროება მოითხოვდა და წავედი საქართველოში სათამაშოდ და ვფიქრობ, ჩემი ქვეყნის გამო სწორი გადაწყვეტილება მივიღე“,- ამბობს ხვიჩა კვარაცხელია.
ამის შემდეგ კი ხვიჩა კვარაცხელიას მისამართით სოციალურ ქსელებში ნეგატიური კომენტარების დაფიქსირება და მისი ბულინგი დაიწყო.
„ქართველს, ოკუპირებული ქვეყნის ეროვნული ნაკრების ფეხბურთელს, უკრაინაზე რომ გკითხავენ და იტყვი, პოლიტიკაში არ ვერევიო, ნაპოლიში კი არა, რეალში რომ ითამაშო, მაგრად მკიდია უკვე. ამის გამო ერთხელ კრიტიკული სტატუსი დავწერე. მერე ვიფიქრე, იქნებ ბათუმში გადასვლის შემდეგ მაინც თქვას-მეთქი რამე და ცოტა შევარბილე. ისევ ხმა არ ამოიღო. ახლა იტალიაშია, ჟურნალისტებმა შეკითხვა დაუსვეს და იქაც კრინტი ვერ დაძრა პუტინზე.
არ ვიცი, რა ვალდებულებები აქვს ასეთი რუსულ კლუბთან, მაგრამ მართლა ვერ ვუგულშემატკივრებ, სანამმკაფიო პოზიცია არ ექნება უკრაინაზე. ფეხბურთი ბოროტებაზე თვალის დახუჭვას არ ნიშნავს. ფეხბურთი პოლიტიკისგან არ იმიჯნება“ - დაწერა ჟურნალისტმა ვახო სანაიამ სოციალურ ქსელში.
თუმცა ფეხბურთელს დამცველებიც მრავლად გამოუჩნდა, მათ შორის საკანონმდებლო ორგანოდან.
დეპუტატი ალეკო ელისაშვილი ხვიჩა კვარაცხელიას გარშემო აგორებულ ამბებს სოციალური ქსელით გამოეხმაურა. მისი თქმით, კვარაცხელია ომის დაწყებისთანავე რუსეთიდან წამოვიდა და ეს იყო მისი პატრიოტული განაცხადი.
„ვიღაც არაფრისმაქნისები ხვიჩა კვარაცხელიას ლანძღავენ რუსეთს რატომ არ აგინაო. ისეთები ანთხევენ ბოღმას მართლა არაფრისმაქნისები რომ არიან და მარტო სხვის ლანძღვაში რომ გახდნენ დიდოსტატები. კვარაცხელია ომის დაწყებისთანავე რუსეთიდან წამოვიდა და ბათუმში ითამაშა დიდებულად, ეს იყო მისი პატრიოტული განაცხადი. თავი დაანებეთ ამ ბიჭს, მასზე დიდ ქართულ საქმეს არავინ არ აკეთებს და მით უფრო ვიღაც ქეციანი უსაქმურები თითი თითზე რომ არ დაუდიათ საქართველოსთვის. მიდი ხვიჩა, მაგ ტუტუცებს არ უგდო ყური! ეგეთები სულ იქნებიან, მთავარია შენ გვასახელო კიდევ უფრო მეტად! გაუმარჯოს ხვიჩა კვარაცხელიას!“, დაწერა დეპუტატმა სოციალურ ქსელში.