Yandex-ს სამომავლო რესტრუქტურიზაციისთვის მასალები რუსეთის ფედერაციის ციფრული განვითარების, ტელეკომუნიკაციებისა და მასმედიის სამინისტროში არ წარუდგენია. როდის შეიძლება მოხდეს Yandex-ის რესტრუქტურიზაცია უცნობია, მაგრამ გარიგება აქციონერთა თანხმობას საჭიროებს. რუსული მედიის ინფორმაციით, Yandex-ის აქციონერთა ყოველწლიური კრება 22 დეკემბერსაა ჩანიშნული, განიხილება თუ არა ამ შეხვედრაზე კომპანიის რუსულ და საერთაშორისო ბიზნესებად დაყოფა, უცნობია.

ნოემბერში რუსულმა კომპანია Yandex-მა კორპორაციულ სტრუქტურაში შესაძლო ცვლილებები დააანონსა, რომლის მიხედვითაც ის რუსულ და საერთაშორისო ბიზნესებად უნდა დაყოფილიყო, ნიდერლანდებში რეგისტრირებული მთავარი სტრუქტურული ერთეული Yandex N.V.-ი კი რუსული ბიზნესიდან გადიოდა.

რუსული მედია წერდა, რომ რესტრუქტურიზაციაში მონაწილეობას მიიღებდა ალექსეი კუდრინი, რომელმაც რუსეთის ფედერაციის ანგარიშთა პალატის ხელმძღვანელის პოსტი ოფიციალურად დატოვა და ახლა Yandex-ის კორპორაციული განვითარების საკითხებში მრჩევლის პოზიციას იკავებს.

რუსული მედიის ინფორმაციით, ამ ეტაპზე არც Yandex N.V. და არც მისი სტრუქტურები ევროკავშირის სანქციების ქვეშ არ არიან. Yandex-ის სანქცირებული თანადამფუძნებელი არკადი ვოლოჟი მალევე გადადგა აღმასრულებელი დირექტორის პოსტიდან. რაც შეეხება კომპანიის ყოფილ მმართველ დირექტორ ტიგრან ხუდავერდიანს, ევროკავშირის სანქციებს ის სასამართლოში აპროტესტებს.

შეგახსენებთ, რომ რუსული კომპანია Yandex-ის ქართული პარტნიორი Yandex Taxi საქართველოში 2016 წლიდან ოპერირებს.