Yandex-ის აღმასრულებელი დირექტორი და კომპანიის დირექტორთა საბჭოს წევრი ტიგრან ხუდავერდიანი თანამდებობას ტოვებს. ამის შესახებ Yandex-ში განაცხადეს. ის გამოვა დირექტორთა საბჭოდან და ასევე დატოვებს თანამდებობებს შვილობილ კომპანიებში. ეს მას შემდეგ მოხდა, რაც ხუდავერდიანი ევროკავშირმა სანქცირებულთა სიაში შეიყვანა.
„ჩვენ ძალიან გაკვირვებული ვართ იმით, რომ ტიგრანი ევროკავშირის სანქცირებულთა სიაში მოხვდა. ვწუხვართ, რომ ის ვერ იქნება Yandex N.V-ის აღმასრულებელი დირექტორის მოადგილე და დატოვებს დირექტორთა საბჭოს. ტიგრანი კომპანიაში 15 წელზე მეტია მუშაობს და დიდი ძალისხმევა დახარჯა იმის უზრუნველსაყოფად, რომ Yandex განვითარებულიყო, როგორც მსოფლიო დონის ტექნოლოგიური კომპანია, მომხმარებლების, პარტნიორების, თანამშრომლებისა და აქციონერების ინტერესების გათვალისწინებით“, - განაცხადა Yandex N.V-ის დირექტორთა საბჭოს თავმჯდომარემ ჯონ ბოინტონმა.
ხუდავერდიანი იანდექსის აღმასრულებელი დირექტორის თანამდებობაზე რუსეთში 15 მარტს დაინიშნა, მას ელენა ბუნინა შეცვალა.
მანამდე RBC წყაროზე დაყრდნობით წერდა, რომ Yandex გეგმავს თავისი შვილობილი კომპანიები Yandex.News და Yandex.Zen გაყიდოს.
ხუდავერდიანის წინააღმდეგ სანქციების დაწესების გადაწყვეტილება ევროკავშირმა, მას შემდეგ მიიღო, რაც Yandex.News-ის ყოფილმა ხელმძღვანელმა ლევ გერშენზონმა განაცხადა, რომ Yandex-ის რუსი მომხმარებლები ვერ ხედავენ რეალურ სურათს, თუ რა ხდება უკრაინაში.
„სანქციების შემდეგ, იანდექსის გაკოტრების საფრთხე მაქსიმალურად გაიზარდა“, - ასე აფასებს ამის ხუდავერდიანის თანამდებობის დატოვებას შესახებ „ჯეპრას“ მთავარი კონსულტანტი სოსო გალუმაშვილი. იგი სოციალურ ქსელში წერს, რომ ყველა ოკუპანტმა ტიგრანის ბედი უნდა გაიზიაროს. მის facebook პოსტს „კომერსანტი“ უცვლელად გთავაზობთ:
„ესეც ასე!
❗ჩემთვის ერთ-ერთი ყველაზე საძულველ რუსულ კომპანიას დიდი პრობლემები დაეწყო.
❗რატომაა საძულველი, იმასაც ვიტყვი: 2008 წელს, საქართველოს ტერიტორიის ოკუპაციისა და რუსეთის დუმის მიერ აფხაზეთისა და სამხრეთ ოსეთის ცნობის შემდეგ, იანდექსი პირველი იყო, საქართველოს კუთვნილი მიწა რუკებზე ე.წ. დამოუკიდებელ სახელმწიფოებს რომ გადაულოცა და ქვეყნების რეესტრში აფხაზეთი და სამხრეთ ოსეთი დაამატა.
❗"იანდექსი" ყიდის მისი ბიზნესის რამდენიმე მიმართულებას.
❗იანდექს-რუსეთის გენერალური დირექტორი, ტიგრან ხუდავერდიანი, დაკავებული თანამდებობიდან გადადგა.
❗არადა, მისტერ ტიგრანი ამ თანამდებობაზე მხოლოდ 1 დღე იმყოფებოდა.
❗ევროკავშირმა და დიდმა ბრიტანეთმა ტიგრან ხუდავერდიანი სანქცირებულთა სიაში შეიყვანა. ამის გამო ის იძულებული გახდა, დაეტოვებინა იანდექსის დედა კომპანიის სამეთვალყურეო საბჭო, რომელიც ნიდერლანდების ოფშორშია რეგისტრირებული.
❗იანდექსი უკვე დატოვა რამდენიმე საკვანძო მიმართულების ხელმძღვანელმა.
❗სანქციების შემდეგ, იანდექსის გაკოტრების საფრთხე მაქსიმალურად გაიზარდა.
❗ ყველა ოკუპანტმა ტიგრანას ბედი უნდა გაიზიაროს!
გაუმარჯოს ერთიან საქართველოს!
სლავა უკრააინე! - წერს გალუმაშვილი.
წყარო:kommersant.ru