Yandex, რომელსაც ხშირად რუსულ გუგლადაც მოიხსენებენ, ქვეყანაში საკუთარი აქტივების გაყიდვას და საერთაშორისო პროექტების გაუქმებას აპირებს, რისთვისაც რუსეთის პრეზიდენტის ვლადიმირ პუტინის თანხმობას ელოდება - აღნიშნულის შესახებ ინფორმაცია გამოცემა Financial Times ავრცელებს,
მათივე ცნობით, კომპანიასა და პრეზიდენტს შორის არაფორმალური შუამავალი, რუსეთის ყოფილი ფინანსთა მინისტრი და პუტინთან დაახლოებული პირი ალექსეი კუდრინია. გამოცემა სამ წყაროზე დაყრდნობით წერს, რომ კომპანიის რესტრუქტურიზაციის შემდეგ კუდრინი ხელმძღვანელ პოზიციაზე დაინიშნება. ცვლილებები ითვალისწინებს Yandex-ის ჰოლანდიური ჰოლდინგის რუსეთის ბაზრიდან გასვლას, კომპანია საძიებო სისტემას და ელექტრონული კომერციის პლატფორმას გაყიდის.
გამოცემის ცნობით, რესტრუქტურიზაცია არის იმის აღიარება, რომ Yandex-ის ამბიციები, გამხდარიყო გლობალური ინტერნეტ გიგანტი, დასრულდა, რადგან დასავლელი ინვესტორები და ძირითადი პარტნიორები რუსულ ჯგუფს უკრაინაში შეჭრის შემდეგ დაშორდნენ.
როდესაც ნიუ-იორკში დაფუძნებულმა Nasdaq-მა ვაჭრობა თებერვალში შეაჩერა, Yandex-ის საბაზრო კაპიტალიზაცია 6,8 მილიარდ დოლარამდე დაეცა, რომელიც სულ რაღაც ერთი წლის წინ 30 მილიარდ დოლარს შეადგენდა.
თუ დღევანდელ შეხვედრაზე პუტინი საბოლოოდ დათანხმდება კუდრინის დანიშვნას, ის ანგარიშების პალატის ხელმძღვანელის პოზიციას დატოვებს და Yandex - ში მაღალ თანამდებობას დაიკავებს, ამის შესახებ ინფორმაცია FT - ს წყარომ მიაწოდა.
რუსეთთან კავშირების გაწყვეტით, Yandex იმედოვნებს, რომ ის დაიცავს თავის ახალ საწარმოებს, თვითმართვად მანქანებს და საგანმანათლებლო ტექნოლოგიებს.
უკრაინაში რუსეთის შეჭრის შემდეგ, დასავლელმა პარტნიორებმა Yandex-თან ურთიერთობა შეწყვიტეს. Yandex-ის აღმასრულებელი დირექტორები საინფორმაციო პლატფორმაზე ომის მხარდამჭერი რუსული პროპაგანდის ხელშეწყობის გამო ევროკავშირის სანქციების სიაშიც მოხვდნენ და მარტში ევროკავშირმა Yandex-ის აღმასრულებელი დირექტორის მოადგილეს, ტიგრან ხუდავერდიანს სანქციები დაუწესა, იგი პასუხისმგებელი იყო ახალი ამბების განყოფილებაზე. რაც შეეხება ყოფილ ფინანსთა მინისტრ კუდრინს, მან თანამდებობა მას შემდეგ დატოვა, რაც პუტინმა თებერვლის ბოლოს უკრაინაში შეჭრა ბრძანა.
თაკო კვაჭანტირაძე
Yandex
