ესტონეთში Yandex NV-ის ოპერირება აიკრძალა. გავრცელებული ინფორმაციით, რუსულ კომპანიას ესტონეთში ტაქსისა და საბროკერო მომსახურება ეკრძალება, შესაბამისად, ინტერნეტ-პროვაიდერებმა Yandex NV ვებგვერდებსა და ტაქსის აპლიკაციებზე, Yandex Go-სა და Yandex Pro-ზე წვდომა უნდა შეზღუდონ. ასევე, შესაბამისი აპლიკაციების ჩამოტვირთვა და განახლება უნდა შეწყდეს Google Play-ზე, App Store-ზე და მსგავს პლატფორმებზე.
როგორც ესტონეთის მეწარმეობისა და საინფორმაციო ტექნოლოგიების სამინისტრომ განაცხადა, სანქციების მიზანი რუსეთის სადაზვერვო სამსახურების მიერ ესტონეთის მომხმარებლების მონაცემების შეგროვებისა და გამოყენების აღკვეთაა.
აღნიშნულ განცხადებას ეხმაურება Yandex.Taxi BV, რომელიც მიიჩნევს, რომ მიღებული გადაწყვეტილება უსაფუძვლოა და მის გაპროტესტებას აპირებს. მათივე განმარტებით, Yandex.Taxi BV, რომელიც ესტონეთში ოპერირებს, ნიდერლანდებშია რეგისტრირებული, არ აქვს კავშირი რუსეთთან და გააჩნია მკაცრი კონფიდენციალურობის პოლიტიკა.
„ჩვენ უსაფუძვლოდ მივიჩნევთ ესტონეთის ხელისუფლების მოთხოვნას ჩვენი მუშაობის შეზღუდვის შესახებ და მას აუცილებლად გავასაჩივრებთ. აქამდე არ ყოფილა არავითარი საჩივარი Yandex-ის მიმართ. Yandex Go აპლიკაციას ესტონეთში და ბევრ სხვა ქვეყანაში, მათ შორის, საქართველოში, მართავს კომპანია Yandex.Taxi BV, რომელიც რეგისტრირებულია ნიდერლანდებში და სრულად შეესაბამება ევროკავშირის კანონმდებლობას, GDPR-სა და ადგილობრივ კანონმდებლობას. ესტონეთის ხელისუფლების მიერ მოხსენიებული რუსული კანონპროექტი უკვე რამდენიმე წელია განიხილება და არავითარი კავშირი არ აქვს ესტონეთთან და სხვა ქვეყნებთან. რუსეთში კანონი ამ ფორმით რომც იყოს მიღებული, ის მხოლოდ რუსულ სერვისზე და რუსეთში განხორციელებულ მგზავრობებზე გავრცელდება. შეგახსენებთ, რომ კომპანია Yandex.Taxi B.V., რომელიც რეგისტრირებულია ნიდერლანდებში, არ ახორციელებს სერვისს რუსეთში. ჩვენს კომპანიას აქვს მკაცრი უსაფრთხოების პოლიტიკის სტანდარტები, რომლებიც დამოწმებულია საჯარო საერთაშორისო SOC2/3 მოხსენებით უსაფრთხოების, ხელმისაწვდომობის, პატიოსნად დამუშავებისა და მონაცემთა კონფიდენციალურობის შესახებ,“ - აღნიშნულია Yandex.Taxi BV-ის განცხადებაში.
bpn.ge