ყაზახეთის შემდეგ „გუდვილი“ სომხეთის ბაზარზეც შედის. როგორც „კომერსანტს“ „გუდვილის“ გენერალურმა დირექტორმა გიორგი ხაბაშვილმა განუცხადა, 2023 წლის გაზაფხულზე სომხეთის დედაქალაქში “გუდვილის“ ფრანჩაიზით „გუდვილის“ გასტრონომიული სუპერმარკეტი გაიხსნება.
სომხურ პარტნიორ კომპანიასთან შესაბამისი ხელშეკრულება უკვე გაფორმებულია და „გუდვილი“ ერევნის შესასვლელში განთავსებულ დიდ სავაჭრო მოლში იქნება. თავად ამ მოლის გახსნა კი აპრილისთვის იგეგმება. აღნიშნულ სავაჭრო ცენტრში „გუდვილი“ 1000 კვ/მ-ფართობზე იქნება განთავსებული.
„სომხეთში ქართული გასტრონომია ძალიან პოპულარულია და ინტერესი ამ მიმართულებით არის. გარდა ამისა „გუდვილის“ სტილისა და ფორმატის სუპერმარკეტში ძალიან დიდ პერსპექტივას ხედავენ. ისეთი პროდუქცია, რომელიც უძლებს ტრანსპორტირებას და მაღალ გაყინვას, მისი მიწოდება მოხდება საქართველოდან, ხოლო ის პროდუქტები, რომელიც ტრანსპორტირებას ვერ უძლებს, ადგილზე დამზადდება“, — აცხადებს კომერსანტთან ხაბაშვილი.
აღსანიშნავია, რომ მიმდინარე წელს „გუდვილი გურმე“ ალმატიში უკვე გაიხსნა.
„რამდენიმე ქვეყნიდან “გუდვილის“ ფრანჩაიზზე ინტერესი არის და მოლაპარაკებები მიმდინარეობს“, — აცხადებს გიორგი ხაბაშვილი.
კომპანია „გუდვილი“ 2004 წლიდან ქართული საცალო ბაზრის ლიდერი ბრენდია. „გუდვილი“ პროდუქტის ასორტიმენტისა და რეალიზაციის ზრდასთან ერთად საკუთარ წარმოებებსაც აფართოებს. კომპანიის მენეჯერთა მთავარი ამოცანა ინოვაციების, ახალი პროდუქტების, მომხმარებელზე ორიენტირებული პროექტების, ახალი ბიზნეს იდეების შეთავაზებაა.
,,გუდვილი’’ საკვები და არასაკვები პროდუქტის ერთ-ერთი უმსხვილესი იმპორტიორია გერმანიიდან, ჰოლანდიიდან, იტალიიდან, საფრანგეთიდან, ბულგარეთიდან და უკრაინიდან. ჰყავს 300-ზე მეტი კორპორაციული კლიენტი. ასევე, მსურველებს სთავაზობს უმაღლესი ხარისხის ქეითერინგისა და სადღესასწაულო მომსახურებას.