ყაზახური Forbes ყველაზე გავლენიანი ბიზნესმენების რეიტინგს აქვეყნებს. რეიტინგში სულ 50 ბიზნესმენია და ყველაზე გავლენიანებს შორის ერთი ქართველიცაა.
სს Kaspi.kz-ის აქციონერი, დირექტორთა საბჭოს წევრი და გამგეობის თავმჯდომარე მიხეილ ლომთაძე ყველაზე გავლენიანი ბიზნესმენების TOP-50-ში მეშვიდე პოზიციაზეა. რაც იმას ნიშნავს, რომ ბიზნესმენმა რეიტინგში პოზიციები 5 პუნქტით გაიმყარა და დაწინაურდა. 2021 წლის რეიტინგში მიხეილ ლომთაძე მე-12 ადგილს იკავებდა. 2020 წლის რეიტინგში ის Forbes-ის რეიტინგში მე-10 ადგილს იკავებდა.
როგორც Forbes წერს, მიხეილ ლომთაძე ჰარვარდის ბიზნეს სკოლის ახლო აღმოსავლეთისა და ჩრდილოეთ აფრიკის მრჩეველთა საბჭოს წევრია.
გამოცემის ცნობით, 2022 წლის პირველი ნახევრის ანგარიშში Kaspi.kz იუწყება, რომ GMV (საიტზე გაყიდული საქონლის ჯამური ღირებულება) Kaspi Travel-ის მიმართულებით გაიზარდა 300%-ზე მეტით და მიაღწია 99 მილიარდ ტენგეს. ონლაინ სუპერმარკეტის კატეგორიაში Magnum-თან თანამშრომლობაც წარმატებული იყო, რასაც 2022 წლის მეორე კვარტალში 265 000 შეკვეთა მოჰყვა, საშუალოდ $25 ჩეკით.
იმისათვის, რომ განავითაროს ლოგისტიკური მიმართულება, როგორც კომპანიონი ბაზრისთვის, კომპანია აგრძელებს ამანათის ტერმინალების ქსელის გაფართოებას. ზაფხულის დასაწყისში მათგან 1600-ზე მეტი იყო ყაზახეთის 20 ქალაქში და იგეგმება ამ რიცხვის 3000-მდე გაზრდა წლის ბოლომდე. ანგარიშის მიხედვით, ამანათები მიწოდების 12,4%-ს შეადგენს.
წელს Kaspi.kz-მა ზედიზედ მეხუთედ დაიკავა პირველი ადგილი უმსხვილესი ონლაინ სავაჭრო პლატფორმების Baker Tilly Qazaqstan-ისა და Forbes Kazakhstan-ის რეიტინგში.
როგორც Forbes წერს მიმდინარე რეიტინგის შედგენისას წინა რეიტინგთან შედარებით, მონაწილეთა საშუალო ასაკი ორი წლით გაიზარდა - 52-დან 54 წლამდე და თავად სია სრულიად მამაკაცებით დაკომპლექტდა (გასულ წელს მხოლოდ გაუხარ კაპაროვა მოხვდა საუკეთესო 50-ეულში).
აღსანიშნავია ისიც, რომ მიხეილ ლომთაძე მიმდინარე წლის სექტემბერში ყაზახეთში ზედიზედ მეხუთედ საუკეთესო CEO-დ დასახელდა.
ყაზახეთში ყოველწლიურ ფორუმზე Kazakhstan Growth Forum-ზე ყაზახეთის წამყვანი საფინანსო-ტექნოლოგიური კომპანია Kaspi.kz-ის თანადამფუძნებელი და აღმასრულებელი დირექტორი მიხეილ ლომთაძე საუკეთესო CEO-დ ზედიზედ მეხუთედ დაასახელეს. ლომთაძემ ჯილდო „საუკეთესო სამომხმარებლო გამოცდილებისთვის“ მიიღო. აღსანიშნია, რომ საუკეთესო მმართველებს ყოველწლიურად Kazakhstan Growth Forum-ის საბჭოს ექსპერტები ასახელებენ და გამარჯვებულს ყაზახეთის ეკონომიკის სხვადასხვა დარგში მოქმედი 500 საუკეთესო კომპანიიდან ირჩევენ.
ცნობისთვის, Kaspi.kz-ის თანადამფუძნებელი მიხეილ ლომთაძე ყაზახეთში სხვა ორგანიზაციების მიერ ჩატარებული კვლევებითაც აღიარებული მმართველია. PricewaterhouseCoopers-ის (PwC) გამოკითხვის მიხედვით მიმდინარე წლის აპრილში მიხეილ ლომთაძემ წლის საუკეთესო CEO-ს წოდება ასევე ზედიზედ მეხუთედ მოიპოვა.
PricewaterhouseCoopers-ის (PwC) გამოკითხვაში 71 უმსხვილესი ყაზახური კომპანიის აღმასრულებელი დირექტორი მონაწილეობდა, ხმათა უმრავლესობით კი გამარჯვებულად ლომთაძე იქნა შერჩეული.
აღსანიშნავია, რომ Kaspi ყაზახეთის მასშტაბით უმსხვილესი ფინ-ტექ კომპანიაა, რომელსაც 7 მილიონზე მეტი მომხმარებელი ჰყავს.
ყაზახეთი მიხეილ ლომთაძე Kaspi.kz
მიხეილ ლომთაძე
