ყაზახეთმა დასავლეთისთვის ურანის მიწოდება აზერბაიჯანისა და საქართველოს გავლით აქტიურად დაიწყო. როგორც ყაზახური მედია წერს, ყაზახეთის ეროვნულმა ატომურმა კომპანია Kazatomprom-მა 20 დეკემბერს ტრანსკასპიური საერთაშორისო სატრანსპორტო მარშრუტით (TITR) ბუნებრივი ურანის ფიზიკური მიწოდების შესახებ გამოაცხადა.
როგორც Kazatomprom-ი წერს, კომპანიის მიერ ტრანსკასპიური მარშრუტი 2018 წლიდან გამოიყენება, როგორც ძირითადი მარშრუტის ალტერნატივა, თუმცა გადაზიდვებს ქვეყანა მაინც რუსეთის გავლით ახორციელებდა. დღეს კი რუსეთის წინააღმდეგ დაწესებულმა სანქციებმა ვითარება შეცვალა.
„კომპანია 2018 წლიდან წარმატებით იყენებს TMTM-ს, როგორც ალტერნატიულ მარშრუტს Kazatomprom-ის პროდუქტების დასავლურ ბაზრებზე მიწოდებისთვისს - რაიმე მიზეზით მთავარი მარშრუტის მიუწვდომლობის პოტენციური რისკის შესამცირებლად“ - ნათქვამია კომპანიის განცხადებაში.
მედია აქტიურად წერდა, რომ სექტემბერში ყაზახური ურანი აზერბაიჯანისა და საქართველოს გავლით ფოთის პორტში გაიგზავნა, იქიდან კი საზღვაო გზით კანადაში მიიტანეს.
შეგახსენებთ, ოქტომბერში გავრცელდა ინფორმაცია, რომ ყაზახეთის სახელმწიფო კორპორაცია ურანის საექსპორტო მარშრუტის ალტერნატივას აქტიურად განიხილავდა, რადგანაც მანამდე ყაზახური ურანი მსოფლიო ბაზარს რუსეთის გავლით მიეწოდებოდა.
შემდგომ აღნიშნულ საკითხზე განცხადება გაავრცელა შემოსავლების სამსახურმაც, სადაც უწყება განმარტავდა, რომ საქართველოს სატრანსპორტო დერეფნით ყაზახური ურანის ტრანსპორტირება წარსულშიც ხდებოდა. შემოსავლების სამსახური აცხადებდა, რომ სექტემბერში საქართველო 787-მა ტონა ყაზახურმა ურანმა გადაკვეთა, რომელიც კანადაში ექსპორტისთვის არის განკუთვნილი.
ურანი
