ყაზახეთმა რუსეთის გვერდის ავლით თავისი ნავთობის პირველი სატესტო გადაზიდვა განახორციელა კასპიის ზღვისა და აზერბაიჯანის გავლით. ამის შესახებ Forbes-ი აზერბაიჯანული კასპიის საზღვაო გადაზიდვის ვებსაიტზე დაყრდნობით იუწყება.
ყაზახური მხარის ცნობით, საცდელმა გადაზიდვამ აჩვენა ნავთობის საექსპორტო მარშრუტების დივერსიფიკაციის შესაძლებლობა სარკინიგზო ტრანსპორტით ტრანსკასპიური მარშრუტისკენ.
ახლა ყაზახური ნავთობის ძირითადი საექსპორტო მარშრუტი გადის რუსეთზე: კასპიის მილსადენის კონსორციუმიდან ნოვოროსისკამდე, საიდანაც საწვავი იგზავნება ზღვით დანიშნულების ადგილამდე. ყაზახეთს არ აქვს პირდაპირი წვდომა მსოფლიო ოკეანეზე.
2022 წლის ივლისში ყაზახეთის პრეზიდენტმა ყასიმ-ჯომარტ ტოკაევმა მთავრობას რუსეთის გვერდის ავლით ნავთობის მიწოდების ახალი გზების განვითარება დაავალა, მათ შორის საზღვაო გზით.
ყაზახეთის ქაშაგანის საბადოდან მოპოვებული ნავთობი კასპიის ზღვის გავლით ბაქოს მახლობლად მდებარე სანგაჩალის ტერმინალში მიეწოდება. სწორედ ამ ტერმინალიდან იღებს სათავეს ბაქო-თბილისი-ჯეიჰანის ნავთობსადენი. აზერბაიჯანის კასპიის ზღვის გადამზიდავი კომპანიის (ASCO) საშუალებით, ნავთობის ტრანსპორტირებას ახალი მარშრუტით ტანკერი Akademik Khoshbakht Yusifzade ახორციელებს. აღნიშნული ტანკერის საერთო მოცულობა 7800 ტონაა, მას შეუძლია ნავთობისა და ქიმიური პროდუქტების გადატანა. ტანკერში ჩატვირთული ნედლი ნავთობის პირველი პარტიის მთლიანმა მოცულობამ 6900 ტონა შეადგინა.