ვაკეში, ავალიშვილის ქუჩისა და ჭავჭავაძის გამზირის კვეთაზე, ყოფილი მე-9 საავადმყოფოს შენობის რეაბილიტაცია, სადაც სასულიერო სემინარია უნდა განთავსდეს, გაურკვეველი ვადითაა გაჩერებული.

ძეგლს 117-წლიანი ისტორია აქვს. ის 1905 წელს სასულიერო სემინარიისთვის აშენდა. ქვეყნის გასაბჭოების შემდეგ შენობაში ჯერ თბილისის სასოფლო-სამეურნეო ინსტიტუტი, 40-იანი წლებიდან კი მე-9 საავადმყოფო განთავსდა. საჯარო რეესტრის თანახმად, საქართველოს მართლმადიდებელ ეკლესიას შენობა 2008 წლიდან დაუკანონდა. ამის შემდეგ გადაწყდა, რომ შენობაში კვლავ სასულიერო სემინარიას უნდა დაედო ბინა და მისი რეაბილიტაცია უნდა დაწყებულიყო. პროცესი წლებია ჭიანურდება, შენობის რეაბილიტაცია კი წინ არ მიდის.

სასულიერო სემინარია მე-9 საავადმყოფოდ გადაკეთებამდე

სასულიერო სემინარიის რეაბილიტაციასთან დაკავშირებით „კომერსანტი“ თბილისის ვაკის მაცხოვრის ფერისცვალების ტაძრის წინამძღვარ, დეკანოზ შალვა კეკელიას ესაუბრა. აღნიშნული ეკლესია სემინარიის ძველ შენობას ჭავჭავაძის გამზირზე ესაზღვრება.

შალვა კეკელიას თქმით, საპატრიარქომ 3 მილიონი გამოყო ძეგლის რეაბილიტაციისთვის და ამ თანხით ძეგლს გამაგრებითი სამუშაოები ჩაუტარდა.

„მე როგორც ვიცი, ეს თანხა სახელმწიფოს არ გამოუყვია, ძეგლის რეაბილიტაციისთვის 3 მილიონი საპატრიარქომ გამოყო. შენობა გასუფთავდა და გამაგრებითი სამუშაოები ჩაუტარდა და დამთავრდა ამით,“ - აცხადებს „კომერსანტთან“ დეკანოზი შალვა კეკელია.

„კომერსანტის“ კითხვაზე ვისი პასუხისმგებლობაა და ვინ უნდა გამოყოს ძეგლის სარეაბილიტაციოდ დანარჩენი თანხა, დეკანოზმა განაცხადა, რომ არ იცის. მისი თქმით, ძეგლს გამაგრებითი სამუშოები ჩატარებული აქვს და დაზიანებით არ ზიანდება.

„ძეგლი არ ზიანდება. მაშინ გაგრძელდება სარეაბილიტაციო სამუშაოები, როცა თანხა გამოიყოფა და როდის მოხდება ეს, ან თანხა ვინ უნდა გამოყოს, არ ვიცი,“ - აცხადებს დეკანოზი შალვა კეკელია.