რადიო „კომერსანტის“ გადაცემაში „აგრო სექტორი“ კომპანია , კარტლისის აკადემიის ხელმძღვანელმა, ლელა გვასალიამ აგრო სექტორში დღეს არსებული ტენდეციებისა და გამოწვევების შესახებ ისაუბრა.
„კარტლისი 20 წელზე მეტია,რაც საქართველოში სოფლის მეურნეობის სფეროში მოღვაწეობს. ამ სფეროში კონკურენცია დიდია და მოწინავე რიგებში ყოფნა საკმაოდ რთულია. თუმცა, კომპანიის სწორი სტრატეგიისა და კონცეფციის საფუძველზე გვიჭირავს ჩვენი ადგილი მოწინავეთა რიგებში. სოფლის მეურნეობის სექტორში ფერმერისთვის ხარისხიანი პროდუქციის მიწოდება და ახალი ტექნოლოგიების დანერგვა ძალიან მნიშვნელოვანია.
ჩვენი პარტნიორები მსოფლიოს წამყვანი ამერიკული და ევროპელი მწარმოებლები არიან. ქართველ ფერმერებში კი კომპანია კარტლისის სახელი ხარისხთან ასოცირდება. კომპანიას აქვს საკმარისზე მეტი სასოფლო სამეურნეო სავარგული,სადაც ყველა იმ პროდუქტის გამოცდა და დარაიონება მიდის,რომელსაც ჩვენ უკვე შემდეგში ვთავაზობთ ფერმერს. ის დროს არ კარგავს ვინაიდან, პირდაპირ მზა პროდუქციას ვთავაზობთ.
კომპანიაში 7-ზე მეტი მეცნიერ თანამშრომელი მუშაობს, მათ შეუძლიათ კვალიფიციური ცოდნა და გამოცდილება შესთავაზონ ფერმერებს. ჩვენი გათვლები დაფუძნებულია ფუნდამენტურ მარკეტინგულ კვლევებზე და ოპტიმისტურია, ვიანაიდან ყოველწლიურად, საქართველოს სასოფლო-სამეურნეო სავარგულები 10-12%-ით იზრდება,“- აღნიშნავს ლელა გვასალია. მისი თქმით, კომპანია აგრძელებს ლექცია-სემინარების ჩატარებას რეგიონებში,რომელსაც დარგის მოწვეული ექსპერტები უძღვებიან.
„მნიშვნელოვანია ვისაუბროთ სოფლის-მეურნეობის სფეროში ცნობიერების ამაღლებაზე. 2017 წელს კარტლისის ბაზაზე შეიქმნა კარტლისის აკადემია,რომელიც ნამდვილად ახალი პლატფორმაა ფერმერების გადასამზადებლად. პირველ რიგში, სწორედ სოფლის მეურნეობა უნდა იყოს რენტაბელური, სადაც დაინერგება ახალი ტექნოლოგიები და ფერმერები აიმაღლებენ ცოდნას, მნიშვნელოვანია კულტურათა დივერსიფიცირების საკითხი. ჩვენ გვაძლევს კლიმატური პირობები იმის საშუალებას,რომ ორი ბრუნვა მოვიყვანოთ სხვადასხვა ბოსტნეულის კულტურების მიმართულებით.
ჩვენს აკადემიაში დღემდე 4000-ზე მეტი ფერმერი გადამზადდა სხვადასხვა მიმართულებით. ეს გრძელვადიანი პროექტი სრულიან უანგაროდ გრძელდება. წლის განმავლობაში ორ ეტაპად ლექციები ტარდება ხეხილის, ბოსტნეულის კულტურების მიმართულებით. გვაქვს ფერმერთა მომსახურების ცენტრები ყველა რეგიონში, სადაც სპეციალისტები თავად მიდიან რეგიონებში და ატარებენ ლექცია-სემინარებს.
მთელს მსოფლიოში არის ტენდეცია იმისა,რომ ტრადიციულ ბოსტნეულ კულტურებზე მოთხოვნა ნელ-ნელა მცირდება და იზრდება არატრადიციულზე მოთხოვნა. ამ ლექცია-სემინარებით ფერმერები ბაზრის ახალ მოთხოვნებსაც ეცნობიან,“- ამბობს ლელა გვასალია.
კომპანია კარტლისი
