საქართველომ ექსპორტზე პოზიციები ბოლო პერიოდში საკმაოდ გაიმყარა, მაგრამ პანდემიამდელ ნიშნულთან დაბრუნება ჯერჯერობით მაინც ჭირს. ტრადიცია გრძელდება და ექსპორტზე მოწინავე პოზიციას მძიმე მრეწველობა არ თმობს. სპეციალისტები ამბობენ, რომ ახლანდელი მაჩვენებლის შენარჩუნება შესაძლებელია, თუმცა უფრო მეტი უნდა გაკეთდეს, რათა ექსპორტ-იმპორტს შორის დისბალანსი მინიმუმამდე დავიდეს. 

მართალია, 2020 წელთან შედარებით მდგომარეობა გამოსწორდა, თუმცა მოლოდინი გაცილებით მეტია. აკადემიკოს ავთო სილაგაძის შეფასებით,  ნამდვილად კარგი შედეგია, თუმცა მეტი უნდა გაკეთდეს, რათა ექსპორტის არეალი უფრო გაფართოვდეს. რაც ხელს შეუწყობს სამამულო წარმოების ზრდას და დამატებით სამუშაო ადგილებს შექმნის. 

,,ექსპორტის ზრდა უდავოდ კარგი ფაქტია, მაგრამ როგორი ორიენტირი უნდა გვქონდეს, ისეთი ცვლილება არ გვაქვს. უკეთესი, უფრო აღმავალი მონაცემი გვჭირდება, რომ  ეკონომიკამ უფრო იგრძნოს და კეთილდღეობა ნებისმიერ ოჯახამდე მივიდეს. საინტერესოა ექსპორტის სასაქონლო ჯგუფი, პირველ ადგილზე სპილენძის მადნები და კონცენტრატები, ასევე ფეროშენადნობები, შემდეგ პოზიციაზეა ყურძნის ნატურალური ღვინოები, დაახლოებით 215 მილიონი დოლარის ღირებულებისა, რაც ადგილობრივი ექსპორტის 7,10%-ია. ეს არის ყველაზე მსხვილი, რამაც საექსპორტო მონაცემებზე მოახდინა გავლენა. როგორც ოფიციალური სტატისტიკიდან ირკვევა, 750 მილიონი დოლარის ფარგლებშია სპილენძის მადნებისა და კონცენტრატებისგან მიღებული შემოსავალი, წინა წელს 725 მილიონი დოლარის ფარგლებში იყო. 415 მილიონი აშშ დოლარი შეადგინა ფეროშენადნობების ექსპორტმა, როცა 2020 წელს 214 მილიონი დოლარით განისაზღვრა. ასევე გაიზარდა მინერალური და მტკნარი წყლების, თხილის, ტრიკოტაჟის ნაწარმი და ექსპორტიც, რაც ასევე საინტერესოდ მეჩვენება. მართალია, 2020 წლის სტატისტიკას ბევრად ვაჯობეთ, მაგრამ 2019 წელის მონაცემებისთვის ყველა პარამეტრის მიხედვით არ მიგვიღწევია. თუმცა ეკონომიკა გამოცოცხლდა და ეს სადავო საკითხი არ არის“, - აცხადებს ,,კომერსანტთან“ ავთო სილაგაძე.

აკადემიკოსის ვარაუდით, ახლანდელი პოზიციების შენარჩუნება შესაძლებელია, თუმცა, მთლიანობაში, მოცულობის თვალსაზრისით არასაკმარისია.

,,შესაძლოა, ექსპორტი პროცენტულად მაღალი იყოს, მაგრამ არ იყოს მოცულობით დიდი. ჩვენი ამოცანა უნდა იყოს, გაცილებით მეტი აქტიურობა ყველა მიმართულებით. მენიშნა, რომ შევძელით ვარდნის შეჩერება. რაც იყო გასულ წელს, ეკონომიკისთვის უმძიმესი პერიოდია. საგარეო დახმარებებმა დიდი როლი შეასრულეს. წელსაც რომ უმკაცრესად შეგვეზღუდა ეკონომიკა, ამ შედეგს ვერ მივიღებდით ექსპორტზე, არც დახმარებები იქნებოდა და რთულ მდგომარეობაში აღმოვჩნდებოდით“, - დასძენს ავთო სილაგაძე ,,კომერსანტთან“.

ცნობისთვის, 2021 წლის იანვარ-ნოემბერში საქართველოდან განხორციელებული საქონლის ექსპორტის მოცულობამ (არადეკლარირებული ექსპორტის გარეშე) 3 822.9 მლნ. აშშ დოლარი შეადგინა, რაც 26.7 პროცენტით მეტია გასული წლის შესაბამისი პერიოდის მაჩვენებელზე. 

საქსტატის ცნობით, ექსპორტი რეექსპორტის გარეშე, მთლიანი ექსპორტის 73.5 პროცენტს შეადგენს. აღნიშნული მაჩვენებელი წინა წლის შესაბამის პერიოდთან შედარებით 28.7 პროცენტით გაიზარდა და 2 809.6 მლნ. აშშ დოლარს გაუტოლდა.

ამასთან, საქსტატის ინფორმაციით, მიმდინარე წლის იანვარ-ნოემბერში ადგილობრივი ექსპორტის ათეულში პირველ ადგილზე სპილენძის მადნები და კონცენტრატები არის წარმოდგენილი 750.1 მლნ. აშშ დოლარით, აღნიშნული სასაქონლო ჯგუფის წილი მთლიანი ადგილობრივი ექსპორტის 26.7 პროცენტს შეადგენს. მეორე ადგილზეა ფეროშენადნობები 414.8 მლნ. აშშ დოლარით, ხოლო მესამე ადგილს იკავებს ყურძნის ნატურალური ღვინოები 214.9 მლნ. აშშ დოლარით.

მარი ჩიტაია