ყველა წისქვილი დაკეტილია, - ამის შესახებ „კომერსანტთან“ ხორბლისა და ფქვილის მწარმოებელთა ასოციაციის აღმასრულებელმა დირექტორმა ლევან სილაგავამ განაცხადა. მწარმოებლებს პრობლემები მას შემდეგ შეექმნათ, რაც რუსეთმა ხორბლის საექსპორტო ბაჟის ზრდა დაიწყო, რის ფონზეც საქართველოში ხორბლის იმპორტს აზრს ეკარგება და ფქვილის იმპორტი იზრდება.
მისი თქმით, რუსეთიდან იმპორტირებული ფქვილის ფასის გამო, ქართველი მეწარმეებისთვის ხორბლის გადამუშავება წამგებიანია, რადგანაც ხორბალი ძვირია და კომპანიებს ზარალზე უწევთ მუშაობა.
„ხორბლის იმპორტი ბოლო დროს ფაქტობრივად შეწყდა, რადგანაც აზრი არ აქვს მის შემოტანას. იანვარში შემოსული ხორბალი იყო წინა წელს დადებული კონტრაქტების შედეგი. წისქვილკომბინატები ხორბალს აღარ ღებულობენ, რადგან ყველა წისქვილი დაკეტილია, ისინი არ იღებენ არც იმპორტირებულ და არც ადგილობრივი ფერმერებში დარჩენილ ხორბალს. წისქვილკომბინატებთან ერთად პრობლემები ექმნებათ ადგილობრივ ფერმერებს, ისინი ვერ ყიდიან დარჩენილ ხორბალს და ამიტომ კრედიტების დაფარვაც გაუჭირდებათ, შესაბამისად მათთვის ხორბლის ხვნა-თესვის სამუშაოების დაწყებაც მომავალში რთული იქნება.
საინტერესოა ის ფაქტიც, რომ თუ ადრე, ბაჟის ამოქმედებამდე საქართველოში რუსული ფქვილის იმპორტი დაახლოებით 2% იყო, ახლა 60%-ზე მეტია, რაც რისკების შემცველია“, — ამბობს ლევან სილაგავა.
მისი თქმით, არსებობს რამდენიმე გამოსავალი, რომლებიც ამ პრობლემას მოაგვარებდა, მათ შორის იმპორტის კვოტირება.
„შევთავაზეთ შემოიღონ ფქვილის იმპორტის კვოტირება. თუ შემოვიდოდა სარკისებური გადასახადი, ფქვილის მიწოდების მხრივ, იმ რაოდენობას, რომელიც სჭირდებოდა სოციალურ პურს, მივაწოდებდით ფიქსირებულ ფასად პურის ქარხნებს, რომ ფართო მოხმარების პური არ გაძვირებულიყო. ეს პროგრამა ყველამ მოიწონა, მაგრამ ჯერჯერობით არაფერი იცვლება.
ასევე შესაძლებელია იმ რაოდენობის ფქვილზე, რომელიც საჭიროა სოციალური პურის გამოსაცხობად, სახელმწიფომ კვოტირების სახით, იმპორტირებული ფქვილი წარმართოს პირდაპირ იმ პურის ქარხნებში, რომელიც აცხობენ ყოველდღიური მოხმარების პურს. გამოაცხადონ ტენდერები, ვინც უკეთესი ფასით შემოუტანს პურის ქარხნებს და შეიძინონ. შესაბამისად, ეს იქნება გარანტია იმისა, რომ მათი პური არ გაძვირდება“, — ამბობს სილაგავა.