რადიო „კომერსანტის“ გადაცემაში, „ბიზნესი და სამართალი ნინო ლიპარტიასთან ერთად“ სამედიცინო სექტორის ლიცენზირების პროცესთან დაკავშირებით კლინიკა „პინეოს“ კლინიკურმა დირექტორმა დავით ლოლაძემ ისაუბრა. მისი თქმით ლიცენზირების სტანდარტების მიღებისთვის კლინიკებმა ცვლილებებიდან გამომდინარე გარკვეული პროცედურები გაიარეს. 

„არსებულ, მაგალითად ჩვენი ტიპის კლინიკებში, რომლებმაც წინა დადგენილების მიხედვით ლიცენზირება ჩვეულებრივ გაიარეს და შესაბამისი სტანდარტი მიიღეს, ჩვენი B კორპუსი ალბათ ერთადერთია, რომელიც თანამედროვე სტანდარტებს აკმაყოფილებს, რისთვისაც კლინიკამ ძალიან ბევრი სირთულე გაიარა, დავიწყეთ სამუშაო პროცესი, ვნერგავთ ახალ სერვისებს, გვაქვს პერსონალთან ფინანსური  არასტაბილურობა.  დღეს DRG დადგენილებით, რომ ექთნის მინიმალური საათობრივი ანაზღაურება განისაზღვრა, ამ მხრივ ჩვენ კარგად ვართ , იმიტომ რომ კლინიკაში  არ გვყავს ექიმი, რომელიც  მინიმუმის ნაწილის დაკმაყოფილება სჭირდება და ცოტა მეტი აქვს ხელფასი. ექთნის ხელფასის სტანდარტთან ყველა კლინიკა ცოტა დასაწევია, ყველა კლინიკა განახლების რეჟიმშია და ახლა უცებ დაგვეწია ახალი რეგულაცია და 12 საწოლიანი რეანიმაციების ლიცენზირება“,  -  აღნიშნა დავით ლოლაძემ.

ლოლაძის თქმით მარეგულირებელმა ძალიან კარგად იცის რა ხდება დღეს სექტორში და ვინ როგორ  აკმაყოფილებს  სტანდარტს და  მარეგულირებელმა  პირადად უნდა  გასცეს დავალება კონკრეტული კლინიკის მიმართ, რომელიც  ელემენტარულ სტანდარტსაც ვერ აკმაყოფილებს. 

ლოლაძემ გადაცემაში  ადამიანურ რესურსებზეც ისაუბრა და განმარტა, რომ ადმინისტრაციულ  რესურსებთან  დაკავშირებით  მედიცინასთან კვეთაში  პროფესიონალი  კადრების  გარკვეული დეფიციტი არის, მისვე  თქმით კარგი  ბანკირი  კლინიკის  ფინანსურ  სექტორში  კარგი ვერ იქნება. 

„რაც შეეხება ადმინისტრაციული მიმართულებით კადრების მოძიებას ამის  პრობლემა ნამდვილად არის,  ეს კადრები მაღალ ანაზღაურებადი  კადრებია, რისი გადახდის უნარიც კლინიკას არ აქვს, ყველაზე  დიდი  პრობლემა  სამედიცინო სექტორში საშუალო მედ პერსონალია, ექიმები ასე თუ ისე მოიძებნებიან, ძალიან ბევრი კარგი და კვალიფიციური ექიმები გყავს, მაგრამ არის დარგები, თუმცა ყველაზე დიდი პრობლემა არის  ექთნები, ასისტენტები და  დამხმარეები, რაც პირდაპირ კავშირშია ანაზღაურების ნაწილთან, რადგან ამხელა შრომის გაწევა ორ კაპიკად არავის არ უნდა“, - აღნიშნა დავით ლოლაძემ.

რაც ეხება ექთნების დეფიციტს , დავით ლოლაძე ამბობს, რომ მთავარი პრობლემა აქ არის ის, რომ როდესაც  ადამიანს  არ  აქვს  შესაბამისი ანაზღაურება  ის აუცილებლად  დაიხევს უკან და მის ინტელექტს სხვა  პროფესიული უნარების შეძენას მოახმარს და 2-3 ჯერ მეტ ანაზღაურებას მიიღებს, თუ უცხო ენაც იცის საერთოდ  საზღვარგარეთ წავა.

„პროფესიონალი კადრების გადინება ძალიან დიდია და ჩვენ ჩვენივე გაზრდილ კადრებს ვკარგავთ, როდესაც ამდენი შრომა გაქვს  ჩადებული და შენ გაზრდილ ექიმს  თვალდახუჭული ენდობი და უცებ გირეკავს და გეუბნება, რომ მექსიკის  საზღვარზეა ეს უკვე  კატასტროფაა, ამ ადამიანებს ოჯახების და  ქვეყნის დატოვებისკენ მხოლოდ და მხოლოდ დაბალი ანაზღაურება უბიძგებს“, -  აღნიშნა დავით ლოლაძემ.

თაკო კვაჭანტირაძე