წლის ბოლოსთვის იმედისა და ბედნიერების გლობალური ინდექსი, გასულ წელთან შედარებით, მთელ მსოფლიოში შემცირდა. ამის შესახებ Gallup International-ის კვლევა End of Year-ში არის ნათქვამი, რაც კვლევითი ცენტრის ოფიციალურ ვებგვერდზე ვრცელდება.

„მოახლოებული ეკონომიკური სირთულეების შიში მაღალი რჩება და სტაბილურად იზრდება. მსოფლიოს იმედებზე, შიშებსა და მოლოდინებზე გლობალური პანდემია მაინც აშკარად მოქმედებს, თუმცა რეგიონებისა და ქვეყნების მიხედვით მნიშვნელოვანი განსხვავებები მაინც არსებობს,“ - წერია კვლევაში.

End of Year მსოფლიოში ყველაზე ხანგრძლივი გლობალური გამოკითხვაა, რომელიც Gallup International-მა 1979 წელს დაიწყო. ტრადიციული გამოკითხვა იმედისა და ბედნიერების ინდექსით, ასევე, ეკონომიკური მოლოდინების შეფასებით ტარდება.

2021 წლის დასრულებასთან ერთად, მთელ მსოფლიოში უკეთესი მომავლის იმედი ჩნდება, თუმცა იმედის ამ მაჩვენებელმა რამდენიმე წლის წინანდელ მაღალ დონეს ვერ მიაღწია. მსოფლიოს მოსახლეობის 38% ფიქრობს, რომ 2022 წელი წლევანდელზე უკეთესი იქნება, 28% უარეს წელს ელოდება, ხოლო 27% თვლის, რომ 2022 წელი ისეთივე იქნება, როგორიც 2021 წელი იყო. Gallup-ის შეფასებით, ეს სურათი End of Year 2020-ის შედეგებს ჰგავს, ხოლო 2008 წელი ახალი საუკუნის მსოფლიოში კვლავ ყველაზე დიდი პესიმიზმის წლად რჩება.

ყველაზე იმედიანად ხალხი ინდონეზიაში არის განწყობილი, სადაც მოსახლეობის 76% უკეთესი წლის მოლოდინშია, ისევე, როგორც ალბანეთში - 70%, ნიგერიაში - 68%, აზერბაიჯანში - 62% და ვიეტნამში - 59%. ამდენად, HOPE INDEX-ის ტოპ 5-ეულის ქვეყნებია: ინდონეზია, ალბანეთი, აზერბაიჯანი, ნიგერია და მექსიკა/ვიეტნამი თანაბარი მაჩვენებლით.

იმედის მაჩვენებელი დაბალია ავღანეთში, სადაც უარეს წელს მოსახლეობის 56% ელოდება. შემდეგ თურქეთში - 56%, ბულგარეთში - 48%, პოლონეთში - 47%, ჩეხეთში - 45% და პაკისტანში - 41%. პესიმისტების ხუთეულში შედიან ავღანეთი, თურქეთი, ბულგარეთი, პოლონეთი და ჩეხეთი.

კორეის რესპუბლიკის მოქალაქეების 54% მოელის, რომ მომავალი წელი 2021 წლის მსგავსი იქნება. ასე ვარაუდობს იტალიელების 48%, სერბეთში კი - 42%.

ევროპა, რუსეთი და ახლო აღმოსავლეთი უფრო პესიმისტურია, ხოლო აზიის ქვეყნები უფრო ოპტიმისტურად არიან განწყობილი. შარშანდელ გამოკითხვასთან შედარებით, იმედის მაჩვენებელი მკვეთრად შემცირდა აშშ-ში, გერმანიაში, დიდ ბრიტანეთში, ავსტრალიასა და ინდოეთში, ხოლო იაპონიაში, მექსიკასა და კორეაში მნიშვნელოვნად გაიზარდა. თურქეთი პესიმიზმის რეკორდული მატებით უნიკალური შემთხვევაა, რაც, ნაწილობრივ, ინფლაციის მწვავე ფაქტორმა განაპირობა.

ეკონომიკური მოლოდინები საგანგაშოა, თუმცა შარშანდელთან შედარებით, ეს მაჩვენებლი არ გაზრდილა. თავისი ქვეყნის ეკონომიკურ კეთილდღეობას მსოფლიო მოსახლეობის 26% მოელის, 41% ეკონომიკური სიძნელეებისთვის ემზადება, ხოლო 26% ფიქრობს, რომ 2022 წელი ეკონომიკის მხრივ წლევანდელის მსგავსი იქნება.

ეკონომიკური ოპტიმიზმით ქვეყნები ასე ჯგუფდებიან: ნიგერია - ოპტიმისტების 61%-ით, ინდონეზია - 58%-ით, ვიეტნამი - 55%-ით და აზერბაიჯანი - 52%-ით, ხოლო ალბანეთსა და ინდოეთს თანაბარი, 49%-იანი მაჩვენებელი აქვთ.

ეკონომიკური პესიმიზმი ყველაზე მეტად თურქეთში ჭარბობს, სადაც მოსახლეობის 72% სირთულეებს მოელის. ბოსნია და ჰერცეგოვინაში - 72%, ბულგარეთში - 64%, პოლონეთში - 64%, რუმინეთში - 61%, ავღანეთში - 60% და გერმანიაში - 59%.

ევროპა, განსაკუთრებით კი აღმოსავლეთ ევროპა უფრო პესიმისტურად გამოიყურება, ხოლო განვითარებადი რეგიონები ხშირად უფრო ხალისიანად და იმედიანად არიან.

პანდემიისა და ეკონომიკური სიძნელეების მიუხედავად, პირადი ბედნიერება ყველა მაჩვენებელზე ჭარბობს, რაც ერთგვარ ტრადიციად იქცა. პირადი ბედნიერების თვალსაზრისით, ხალხი მთელ მსოფლიოში საკმაოდ კმაყოფილია. მსოფლიოს მოსახლეობის 56% თავს „ბედნიერად ან ძალიან ბედნიერად“ თვლის, მეათედზე მეტი ამბობს, რომ მეტ-ნაკლებად უბედურია, ხოლო თითქმის მესამედი ამბობს, რომ „არც ბედნიერია და არც უბედური“.

ყველაზე ბედნიერი ხალხი კოლუმბიაში ცხოვრობს, სადაც მოსახლეობის 83% ბედნიერია. შემდეგ ყაზახეთში - 81%, ალბანეთში - 74%, მალაიზიაში - 78% და ნიგერიაში - 78%.

ყველაზე უბედურები არიან ავღანეთში, სადაც მოსახლეობის 36% აცხადებს, რომ უბედური ან ძალიან უბედურია, შემდეგ განაში და ერაყში - თანაბარი 31%-ით, უკრაინაში - 31%-ით, თურქეთში - 23%-ით, პაკისტანში - 23%-ით და რუსეთში - 23%-ით.

ამდენად, HAPPINESS INDEX-ის ტოპ 5-ეულის ქვეყნებია: კოლუმბია, ყაზახეთი, ალბანეთი, მალაიზია და აზერბაიჯანი, ხოლო უბედურების ხუთეულში არიან განა, ავღანეთი, ჰონგ კონგი, ერაყი და რუსეთი.

მსოფლიოს ყველაზე ბედნიერ ადგილებს შორის ლათინური ამერიკა, აფრიკა და აღმოსავლეთ აზია ხშირად სახელდება. ევროპა, ახლო აღმოსავლეთი და რუსეთი უფრო პირქუში მხარეები არიან, ხოლო აშშ ამ მხრივ, როგორც წესი, საშუალო მაჩვენბელს იღებს

bpn.ge