მიმდინარე წლის ზაფხულის განმავლობაში ევროპაში ბუნებრივი აირის ფასი 3-ჯერ არის გაზრდილი და ათას კუბურ მეტრზე 2 500 დოლარს აღწევს. ამის შესახებ მოწმობს ლონდონის ICE ბირჟის ანგარიშები.
ინფორმაციაში ვკითხულობთ, რომ თუ მიმდინარე წლის 1-ელ ივნისს გაზი ფასი 960 დოლარი იყო ათას კუბურ მეტრზე, 31 აგვისტოსთვის მისმა ფასმა 2 490 დოლარი შეადგინა იმავე მოცულობაზე. ზაფხულის პერიოდში კი პიკური მაჩვენებელი 3 541 დოლარი იყო.
ამავე ინფორმაციით, ევროპაში გაზის საშუალო ფასმა ივნისში 1 240 დოლარი შეადგინა, ივლისში 1 850 დოლარი, ხოლო აგვისტოში 2 515 დოლარი.
ანგარიშში ვკითხულობთ, რომ გაზის გაძვირების ძირითად ფაქტორებს შორის იყო: რუსეთიდან მიწოდების მნიშვნელოვანი შემცირება, მათ შორის, ჩრდილოეთის ნაკადის მილსადენიდან, საიდანაც ევროპას 27 ივლისიდან მოყოლებული მაქსიმალური მოცულობის მხოლოდ 20% მიეწოდება. ხოლო 11-21 ივლისს მიწოდება საერთოდ შეჩერებული იყო. მეორე ფაქტორი, რომელმაც გაზის გაძვირებაზე იმოქმედა, ეს იყო ასევე გათხევადებულ გაზზე „გამოცხადებული ნადირობა“ ევროპის ბაზარზე. ამასთან, გავლენის ფაქტორი იყო ივნისის ბოლოს აშშ-ს ტექსასის შტატში ერთ-ერთ გაზსაცავ ტერმინალზე მომხდარი ავარია, რომლის ნაწილობრივი ამოქმედება მხოლოდ ნოემბრისთვის მოხერხდება.