ზამთარში უშუქოდ დარჩენა არ გვემუქრება, ენგურჰესის ჩანაცვლება მოხდება თბოელექტროსადგურებით და იმპორტით, - ამის შესახებ „კომერსანტთან“ საუბრისას ენერგეტიკოსმა გია არაბიძემ განაცხადა.

მისი თქმით, თბოელექტროსადგურების გამომუშავება 800 მგვტ-ია, რომელსაც უკვე ვამუშავებთ.

„ასე რომ პრობლემა, შეფერხება ჩვენ ენერგომომარაგებაში არ გვექნება. თუმცა ბუნებრივია ეს არ იქნება ენგურჰესის მიერ გამომუშავებული ელექტროენერგიის ფასი. რაც შეეხება ენგურს, ჰიდროლოგია წელს საკმაოდ ნორმალური იყო 4 მლრდ-ზე მეტი გამოიმუშავა უკვე ენგურმა. ანუ თავისი წლიური გამომუშავება გააკეთა.

დღეს, რომ გვქონდეს ენგურის შუა წელში 700 მგვტ-იანი წყალსაცავი - ხუდონჰესი, ეს პრობლემა ორმაგად მოიხსნებოდა. მოიხსნებოდა პრობლემა, რომ გვექნებოდა დამატებითი გამომუშავება და ენგურს ასე ადრე არ დაუმთავრდებოდა და საპროექტო ნიშნულზე არ ჩამოვიდოდა წყალსაცავის დონე.

თუ ამას დავამატებთ ნენსკრასა და ნამოხვანს ჩვენ ფაქტობრივად პრობლემას მოვხსნით. საბოლოოდ რა გამოიკვეთა? სასწრაფოდ გვჭირდება წყალსაცავიანი ჰესების მშენებლობის გააქტიურება.ეს ერთი და მნიშვნელოვანი დასკვნა ენგურიდან გამომდინარე, თორემ ენგურჰესი არ არის ბაზისური სადგური. ენგური აშენებული იყო სსრკ-ს დროს პიკური დატვირთვების დასაფარად და მას უნდა ემუშავა წლის განმავლობაში მხოლოდ პიკური დატვირთვების დასაფარად. ჩვენ კი ვამუშავეთ დღე და ღამე ბაზისური სიმძლავრით და ამის შედეგია, რომ წყალი ენგურზე აღარ გვაქვს. აი სიტუაცია“, — აცხადებს ენერგეტიკოსი.

გია არაბიძის თქმით, ელექტროენერგიაზე არსებული მოთხოვნის დასაკმაყოფილებლად ზამთარში იმპორტი დაგვჭირდება.

„ჩვენთან ჯერ კიდევ თბილა. იმპორტი დაგვჭირდება ალბათ დეკემბრისკენ, იანვარი, თებერვალიც ცივია. თუმცა ჩვენ მაქსიმალურად ვამუშავებთ თბოელექტროსადგურებს იმიტომ რომ გაზის სიტუაცია დარეგულირებული გვაქვს. დაახლოებით წლის ბოლომდე ჩვენი კავკასიური გაზსადენი 20 მლრდ-მდე კუბ/მ გაზს გაატარებს და იქიდან დარჩენილი 5%-ი და ოფციური შესაძენი და ასე შემდეგ, შედარებით უკეთესი სიტუაცია გვაქვს გაზის მომარაგების მიმართულებით. შარშან 18 მლრდ კუბ/მ იყო, იმის წინ 16 მლრდ კუბ/მ და ასე შემდეგ. ანუ შედარებით მეტი გაზი გავატარეთ, მეტ გაზს გავატარებთ და მეტი გაზი დაგვრჩება და თბოელექტროსადგურების მუშაობას უფრო თამამად შევძლებთ. აი ეს იმპორტი დაფარავს ენგურს“, —  აცხადებს ენერგეტიკოსი.

შეგახსენებთ, რომ ენგურჰესის ტექნიკურმა დირექტორმა გია ხუბუა განაცხადა, რომ ენგურჰესის წყალსაცავში წყლის დონე საპროექტო მინიმუმს ჩამოსცდა, რაც ასე ადრე პირველად მოხდა.

გია ხუბიას განმარტებით, აღნიშნულის მიზეზი კი ელექტროენერგიაზე მოთხოვნილების პერმანენტული ზრდაა.

„ენგურჰესის წყალსაცავში წყლის დონე ჩამოსცდა საპროექტო მინიმუმს. ზამთრის მარაგი მთლიანად ამოწურულია. ასე ადრე ეს პირველად მოხდა. მიზეზი - ელექტროენერგიაზე მოთხოვნილების პერმანენტული ზრდაა. წყალუხვი წელი არ იყო, მაგრამ არც წყალმცირე ეთქმის, ორივე მოქმედ ჰესზე საშუალო წლიურზე მეტი ელექტროენერგია გამოვიმუშავეთ - წლის ბოლომდე ჯამი ასცდება 4, 5 მილიარდ კვტ.სთ-ს. თბობლოკები და იმპორტი იქნება დენის ძირითადი წყარო ოთხი თვის განმავლობაში. აფხაზეთი, სადაც ზამთარში განსაკუთრებით იზრდება მოხმარება, დიდწილად რუსეთზე იქნება დამოკიდებული, ზამთრის ჩამონადენით ენგური გალი-ოჩამჩირეზე მეტს ვერ დააკმაყოფილებს. რთული ვითარებაა, საიდანაც გამოსავალი ახლო მომავალშიც არ ჩანს“, - აცხადებს გია ხუბუა.