ოფიციალური სტატისტიკის თანახმად, საქართველოს 2019 წელს 9.3 მილიონი საერთაშორისო ვიზიტორი ეწვია. სტატისტიკის პარალელურად კი თბილისის სხვადასხვა უბნებში მდებარე სასტუმროს მეპატრონეები ამბობენ, რომ შარშანდელთან შედარებით, ტურისტების რაოდენობა 40%-ით შეუმცირდათ.
„კომერსანტი“ დაინტერესდა, რამდენად აქტიურად იყო დატვირთული საახალწლო პერიოდში თბილისის სასტუმროები და წინა წელთან შედარებით გაიზარდა თუ შემცირდა უცხოელი დამსვენებლების რიცხვი. როგორც გაირკვა სასტუმროების უმრავლესობას ერთი და იგივე პრობლემა აქვს - არ ჰყავთ ტურისტები, რომელთა ნაკლებობაც გასულ წლებში არ უგრძვნიათ.
„იმის გამო რომ არ მყავდა ტურისტები სასტუმრო 6 იანვარს დავხურე“ - ასე უპასუხა „კომერსანტის“ კითხვას სასტუმრო „პორტალის“ მეპატრონემ.
„ახალ წელს მხოლოდ 3 ნომერი მქონდა გაყიდული. კომუნალურებს ვერ ვიხდით ისეთ დღეშია ტურიზმი და ჩვენი საქმე. ამბობენ, ქვეყანაში 9 მლნ. მეტი ტურისტი შემოვიდა, ეს არის აბსურდი. სასტუმროც მაქვს და პარალელურად გიდიც ვარ, დასაბუთებულად შემიძლია გითხრათ, რომ ასე არ არის. პირიქით, ტურისტების რაოდენობა მკვეთრად შემცირებულია შარშანდელთან შედარებით.“-ამბობს სასტუმრო „პორტალის“ მეპატრონე.
უცხოელი დამსვენებლების სიმცირეზე საუბრობს, მთაწმინდაზე მდებარე სასტუმრო „მეორე სართულის“ დირექტორიც , რომელმაც ჩვენთან საუბრისას აღნიშნა, რომ საერთაშორისო ვიზიტორების რაოდენობა, შარშანდელთან შედარებით 40 პროცენტითაა შემცირებული.
„მართალია ჩვენთან მოსულ სტუმრებს, სერვისი არ შეუცვლიათ და ნომერი სრული პაკეტით დაჯავშნეს, თუმცა, სასტუმროში უცხოელი სტუმრების ნაკლებობა წელს შესამჩვევი იყო. სასტუმრო ნაქირავები მაქვს, არცერთ წელს ქირის გადახდა არ გამჭირვებია, წელს კი იმდენად ცოტა სტუმარი გვყავდა, რომ მეპატრონეს ვთხოვეთ და ქირის ვადა გაგვიხანგრძლივა. “-ამბობს სასტუმრო „მეორე სართულის“ დირექტორი.
ანალოგიური მდგომარეობაა სასტუმრო „სილქ როუდშიც“. სასტუმროს წარმომადგენელი ანი კობალაძე ამბობს, რომ წლევანდელი წლისგან განსხვავებით გასულ წლებში ტურისტების ნაკლებობა შეინიშნებოდა.
„წელს შედარებით ნაკლები სტუმარი გვყავდა ვიდრე შარშან. 40%-ით შეგვიმცირდა სტუმრების რაოდენობა. ნომრებსაც კი შედარებით დაბალ ფასიანს იღებდნენ. ზოგი მხოლოდ საუზმით ჯავშნიდა, ზოგი საერთოდ კვების გარეშე, ამით თანხას ზოგავენ. სტუმრების უმრავლესობა გუდაურში ვიზიტსაც გეგმავდა, თუმცა, კურორტზე უწყლოობისა და უთოვლობის გამო ჯავშანი ჩვენთანაც გააუქმეს. მაგალითად, ვინც 5 დღით აპირებდა დარჩენას, 2 დღეში დატოვეს ქვეყანა.“- ამბობს ანი კობალაძე.
„კომერსანტის“ კითხვაზე, იყო თუ არა ტურისტულად აქტიური ახალი წლის პერიოდში tiffany bar & terrace, სასტუმროს მენეჯერი დიმიტრი შველიძე პასუხობს:
„ახალი წლის პერიოდში წელს და შარშანაც თანაბარი რაოდენობის ტურისტი გვყავდა, რადგან ახალი წელი ყოველთვის დატვრთულია. თუმცა, ზოგად ფონს თუ გავითვალისწინებთ, გაცილებით ნაკლები ტურისტია ქვეყანაში და კონკრეტულად ჩვენს სასტუმროშიც, ვიდრე შარშან.“ ამბობს -დიმიტრი შველიძე.
შეგახსენებთ რომ საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა საზოგადოებას 2019 წლის ანგარიში წარუდგენა, სადაც ნათლად ჩანდა, რომ 2019 წელს პირველად, საქართველოს ისტორიაში ცხრა მილიონზე მეტი საერთაშორისო ვიზიტი შედგა. ზრდა წინა წლის ანალოგიურ პერიოდთან შედარებით +7.1 პროცენტია.
თუმცა რეალური სურათი, რომელსაც დედაქალაქში დავინახავთ, საერთაშორისო სტატისტიკისგან მკვეთრად განსხვავებულია. ტურისტებისგან ნახევრად ცარიელი სასტუმროები და ტურისტულ სეზონზე დამოკიდებული სასტუმროს მეპატრონეები, რომლებსაც იჯარის გადახდაც უჭირთ.
ნათია ლომიძე