ზამთრის კურორტებზე ჯავშნების რაოდენობა მზარდია. როგორც „კომერსანტთან“ Inn Grop-ის აღმასრულებელმა დირექტორმა ერეკლე კოკაიამ განაცხადა, გუდაურზე ჯავშნების უმეტესობა უცხოელების მხრიდან შემოდის, ხოლო ბაკურიანში ძირითადად შიდა ტურისტები ჭარბობენ.
„ზამთრის კურორტებზე მოთხოვნა საკმაოდ მაღალია და იმედი გაქვს, რომ ზამთრის ტურისტული სეზონიც კარგად ჩაივლის. მოთხოვნა არის როგორც ბაკურიანზე ისე გუდაურზე. გუდაურში ძირითადად ლიდერობენ უცხოელი ტურისტები. მოთხოვნა არის ისრაელიდან, ტაილანდიდან, ლიეტუვადან და სხვა.
რაც შეეხება ბაკურიანს უმრავლესობა დამსვენებლებისა არის ადგილობრივი ტურისტები. თუმცა მოთხოვნა უკვე შემოდის აზერბაიჯანიდან და ყაზახეთიდან“, - განაცხადა ერეკლე კოკაიამ.
Inn Grop-ის აღმასრულებელი დირექტორი აცხადებს, რომ ნოემბერი და დეკემბრის პირველი ნახევარი ზამთრის კურორტებისთვის მაინც დაბალ სეზონად ითვლება და შესაბამისადაც ჯავშნების დამსვენებლების რაოდენობა დეკემბრის მეორე ნახევრიდან იზრდება და ეს ზრდა მარტის დასაწყისამდე გრძელდება.
„ნოემბერში დაკავებულობა დაბალია და ძირითადად იზრდება დეკემბრიდან. ნოემბერზე საუბარია 40-50%-ზე, თუმცა ზამთრის კურორტებზე ზრდა არის დეკემბრის ბოლოდან, იანვარი, თებერვალი, მარტის დასაწყისიც მაღალ სეზონად ითვლება. იმედი გაქვს, რომ დაკავებულობა მაღალი, 70-დან 80%-მდე იქნება.“, - განმარტავს Inn Grop-ის აღმასრულებელი დირექტორი.
რაც შეეხება განთავსების ობიექტების ფასებს, ერეკლე კოკაიას თქმით, ტარიფები 2021 წლის ზამთრის სეზონთან შედარებით გაზრდილია და 2019 წლის ფასების იდენტურია.
„შარშანდელთან შედარებით ფასები მაღალია და ეწევა 2019 წლის ფასებს. თითქმის იგივე იქნება, ზოგიერთ შემთხვევაში უფრო მაღალიც“, - აცხადებს Inn Grop-ის აღმასრულებელი დირექტორი ერეკლე კოკაია.