2022-2023 წლის ზამთრის ტურისტულ სეზონზე სასტუმროებში ტურისტების მიმართვიანობა წინა წელთან შედარებით გაზრდილია. ამის ერთ-ერთი მიზეზი პანდემიის დასრულებაა. გასულ ზამთარს, კოვიდ-პანდემიის აფეთქების გამო, ზამთრის კურორტებზე სასტუმროებში ათეულობით ჯავშანი გაუქმდა.

სასტუმრო მენეჯმენტ-კომპანია „კა გრუპის“ (KA Group) დამფუძნებელმა ირაკლი ჭიღლაძემ „კომერსანტთან“ საუბრისას განაცხადა, რომ ბაკურიანსა და გუდაურში ზამთრის სეზონი 10 დეკემბრიდან იხსნება, თუმცა სასტუმროთა ქსელ „მგზავრებში“ ნომრების დაჯავშნა აგვისტოდან დაიწყო.

„კომერსანტს“ კომპანიაში განუცხადეს, რომ ახალი წლის სადღესასწაულო დღეებში თითქმის ყველა ნომერი გაყიდული აქვთ; 29 დეკემბრიდან 15 იანვრამდე ნომრების 80%-ზე მეტი უკვე დატვირთულია, ხოლო 15 იანვრიდან 10 თებერვლამდე პერიოდში კი დატვირთულობა 35%-ია. 

აღსანიშნავია, რომ ბაკურიანსა და გუდაურში საფასო პოლიტიკა და მომხმარებელთა სეგმენტი რადიკალურად სხვადასხვაა. ბაკურიანში უცხოელი ტურისტების უმრავლესობა გალფის ქვეყნებიდან (ერაყი, ირანი და არაბთა გაერთიანებული საამიროები, საუდის არაბეთი), ძირითადად დუბაიდანაა; გუდაურში კი უფრო ის ტურისტები დადიან, ვისაც სრიალი უყვართ. იქ მეტი წილი ევროპელები არიან. ამას გარდა, ზამთრის კურორტებზე ელოდებიან სტუმრებს ფილიპინებიდან, ისრაელიდან, ყაზახეთიდან, ყირგიზეთიდან, რუსეთიდან, უკრაინიდან და კორეიდან.

რაც შეეხება ზამთრის სეზონის ფასებს, სასტუმროთა ქსელ „მგზავრებში“ ნომრის საშუალო ღირებულება ბაკურიანსა და გუდაურში 85-დან 150 დოლარამდეა. ირაკლი ჭიღლაძის თქმით ფასები გასულ წელთან შედარებით 35-40 ლარითაა გაზრდილი.

მაკა ბიბილაშვილი