მოდის ბრენდ Zara-ს მფლობელმა ესპანურმა კომპანია Inditex-მა მეორე კვარტლის გაყიდვებით შვედურ კომპანია H&M-ს გადაასწრო. Reuters-ის ცნობით, Zara-ს გაყიდვებმა პანდემიამდელ დონეს გადააჭარბა მაშინ, როცა H&M-მა, დიდი ძალისხმევის მიუხედავად, ამ დონეს ჯერ ვერ მიაღწია.
მეორე კვარტლის სუფთა მოგებამ 850 მლნ ევროს გადააჭარბა, რაც 214 მლნ ევროთი (181,14 მლნ დოლარით) აღემატება გასული წლის ანალოგიური პერიოდის მაჩვენებელს, ხოლო 2019 წლის მეორე კვარტლის სუფთა მოგებაზე 4%-ით მეტია. მაისი-ივლისის პერიოდში გაყიდვები 6,99 მლრდ ევრომდე გაიზარდა, რაც 2019 წლის იმავე პერიოდის მაჩვენებელზე 7%-ით მეტია. მეორე კვარტლის გაყიდვები კვლევითი კომპანია Refinitiv-ის მიერ გამოკითხული ანალიტიკოსების პროგნოზს დაემთხვა, რომლებიც 7,02 მლრდ ევროს გაყიდვებს ვარაუდობდნენ.
მსოფლიოში მოდური ტანსაცმლის უმსხვილესი საცალო მოვაჭრის, Zara Inditex-ის აღმასრულებელი დირექტორი, პაბლო ისლა აცხადებს, რომ აზიაში გარკვეული შეზღუდვების მიუხედავად, ყველა ბაზრის მაღაზიებსა და ინტერნეტში გაყიდვები ნელ-ნელა ჩვეულ ტემპს უბრუნდება.
„შემოდგომა-ზამთრის სეზონისთვის ჩვენ ძალიან კარგი დასაწყისი გვაქვს. კომპანიის კონკურენტული დიფერენციაცია ამაზე დიდი არასდროს ყოფილა“, - აცხადებს პაბლო ისლა.
ანალიტიკოსების შეფასებით, Inditex-ის ბრენდებისთვის, Zara-სა და Massimo Dutti-ისთვის სარგებელი ბოლოდროინდელ ტენდენციას მოაქვს, როცა მომხმარებლებმა თავიანთი ხარჯები მოდური, სამსახურში გამოსასვლელი ტანსაცმლის შეძენისკენ მიმართეს, რადგან ძირითადი შეზღუდვების მოხსნით, დიდი ქალაქები ნორმალურ ცხოვრებას თანდათანობით უბრუნდებიან.
ესპანური Inditex სულ ახალ მონაცემებსაც აქვეყნებს, რომლის მიხედვითაც მაღაზიებსა და ინტერნეტში აგვისტოს დასაწყისიდან სექტემბრის პირველი კვირის პერიოდის გაყიდვები, მუდმივი გაცვლითი კურსით, 22%-ით მეტია, ვიდრე ერთი წლის წინათ იყო, ხოლო 2019 წლის ანალოგიურ პერიოდს 9%-ით აღემატება.
„მართალია, მოდის ინდუსტრია პანდემიის შემდეგ აღდგენის პროცესშია, მაგრამ დელტა-ვარიანტის გავრცელების გამო ზოგიერთი შეზღუდვა ძალაში რჩება, რაც მას ხელს უშლის. ამასთან, სატვირთო კონტეინერების გლობალური დეფიციტის გამო, სხვა დარგებთან ერთად, მიწოდების პრობლემებს მოდაც აწყდება“ ,- წერს Reuters.
გუშინ, გრინვიჩის დროით 09:40 სთ-ზე, შვედური H&M-ის აქციები 3,3%-ით შემცირდა მაშინ, როცა Inditex-ის აქციები მხოლოდ 1,6%-ით გაუფასურდა. პანდემიის დროს Inditex-მა თავისი ციფრული საცალო ვაჭრობის პლატფორმა გააძლიერა, ხოლო მთელ მსოფლიოში მცირე სავაჭრო ობიექტების დახურვის ხარჯზე, ფლაგმანური მაღაზიები გააფართოვა, რომლებიც მინი-გამანაწილებელ ცენტრებად გადააქცია. დღეს Inditex-ი აცხადებს, რომ მაღაზიების 99% ისევ გახსნა და ამჟამად მის გლობალურ ქსელში მთლიანად 6654 ობიექტი მუშაობს. 2020 წელს მათი რაოდენობა 7 337 ერთეულს შეადგენდა.
აღმასრულებელმა დირექტორმა პაბლო ისლამ დააანონსა, რომ ოქტომბერში, პარიზში Zara-ს ერთ-ერთი მსხვილი მაღაზია გაიხსნება, ხოლო კომპანიის კიდევ ერთი ბრენდი, Uterque მომავალი წლისთვის Massimo Dutti-ის მაღაზიებში ინტეგრირდება, რასაც ციფრული ტრანსფორმაციის სტრატეგია ითვალისწინებს.
Inditex-ის ონლაინ გაყიდვები წლის პირველ ნახევარში, შარშანდელ ანალოგიურ პერიოდთან შედარებით, 36%-ით გაიზარდა. ეს მაშინ, როცა 2020 წელს ძირითად ბაზრებზე, დიდ ბრიტანეთში, გერმანიასა და საფრანგეთში დაწესებული შეზღუდვების გამო, მომხმარებლები საქონელს სახლებიდან ყიდულობდნენ. კომპანიაში მოელიან, რომ წელს საერთო გაყიდვების მოცულობიდან ონლაინ გაყიდვების წილი 25%-ზე მეტი იქნება.
სექტემბრის ბოლოს Inditex მამაკაცის სპორტულ კოლექცია Zara Athleticz-ს ჩაუშვებს.
bpn.ge