ალკოჰოლური და უალკოჰოლო სასმელების ერთ-ერთი წამყვანი მწარმოებელი საქართველოში სს „ქართული ლუდის კომპანია“ ზედაზენი მეორე წელია ზარალზეა. 2019 წლის შემდეგ კომპანიმ პანდემიური 2020 წელი კიდევ უფრო დიდი ₾ 6,8 მლნ-იანი ზარალით დაასრულა. 2019 წელს კომპანიის ზარალი 3.7 მლნ ლარს შეადგენდა.
2019 წელთან შედარებით, მნიშვნელოვნად, ₾14 მლნ-ით შემცირდა კომპანიის შემოსავალი და ₾ 69 მლნ შეადგინა.
პროდუქციის რეალიზაციის მთავარ წყაროს საქართველოს ბაზარი წამოადგენს. როგორც კომპანიის წლიურ ანგარიშში ვკითხულობთ, ზედაზენს 69-მილიონიანი შემოსავლის 89% ადგილობრივ ბაზარზე არსებული გაყიდვებიდან ჰქონდა, 11 % კი პროდუქციის ექსპორტირებიდან მიღებული შემოსავალი იყო. დოკუმენტის თანახმად, 2019 წელს კომპანიის ექსპორტი უფრო მცირე იყო და ის მთლიანი შემოსავლის 7%-ს შეადგენდა.
დოკუმენტის მიხედვით ირკვევა, რომ COVID 19-მა და მასთან დაკავშირებულმა შეზღუდვებმა, რომელმაც ძირითადად გავლენა იქონია სარესტორნე ბიზნესზე, 2020 წელს ადგილობრივ ბაზარზე კომპანიის რეალიზაციების შემცირება გამოიწვია. მოსალოდნელი ნეგატიური ეფექტის შესამსუბუქებლად, კომპანიის მენეჯმენტმა შეძლო საოპერაციო დანახარჯების ოპტიმიზაცია, რამაც გავლენა იქონია საოპერაციო შედეგებზე და მომგებიანობაზე.
ფინანსურ ანგარიშში ნათქვამია, რომ მიუხედავად შექმნილი არასახარბიელო ბიზნეს გარემოსი, კომპანიამ ბაზარს წარუდგინა როგორც ადგილობირვი წარმოების, ასევე იმპორტირებული ლუდის 3 ახალი ბრენდი:
ადგილობირვი წარმოება:
- „რავი“- ლუდი, რომელიც გათვლილია ძირითადად ახალგაზრდა თაობის წარმომადგენლებზე და ხასიათდება სიმარტივითა და სიმსუბუქით.
- „აია“- „აია“ არის პირველი ქართული ლუდის ბრენდი, რომელიც ბაზარზე 1953 წლიდან გამოჩნდა. მისი ჩამოსხმა ხდებოდა ქუთაისში და წარმოადგენს რეგიონულ ბრენდს.
იმპორტირებული პროდუქცია:
- „გრიმბერგენი“- 2020 წლის მიწურულს კომპანიამ სუპერ პრემიალური პორტფელის განვითარებისკენ კიდევ ერთი ნაბიჯი გადადგა და ქართულ ბაზარს წარუდგინა ბელგიური ლუდი „გრიმბერგენი“ 0.33 ლიტრიან შუშის შეფუთვაში.
ასევე, კომპანიამ დაამუშავა და ბაზარს წარუდგინა შინაარსობრივად ახალი პროდუქტი - არომატული წყალი, რომელიც „ჩერო“-ს ბრენდის ქვეშ არის წარმოდგენილი და მოიცავს ოთხი სხვადასხვა გემოს სახეობას: მარწყვი, ვაშლი, გრეიფრუტი, ლიმონი.
ანგარიშის მიხედვით ირკვევა, რომ 2020 წლის 31 დეკემბერსა და 2019 წლის 31 დეკემბერს დასრულებული წლებისთვის ძირითადი ხელმძღვანელი პირების ანაზღაურება მოიცავდა წლიურ ხელფასსა და ბონუსებს, რაც ასახულია „საერთო და ადმინისტრაციულ ხარჯებში“ და „გაყიდვისა და დისტრიბუციის დანახარჯებში“ თანხით ₾ 1 286 000.
კომპანიის უშუალო და საბოლოო მშობელი კომპანია იყო შპს „მიქსორი“ (63.5%). ს.ს. „ქართული ლუდის კომპანიის“ დანარჩენ აქციებს შპს „საქართველოს ინდუსტრიული ჯგუფის ჰოლდინგი“ (24.11%) და შპს „პსპ ფარმა“ (12.39%) ფლობს.
სს „ქართული ლუდის კომპანია“ 2011 წელს დაარსდა და უკვე 2012 წლის მარტში ქართულ ბაზარზე თავისი პროდუქცია წარადგინა. კომპანიას დივერსიფიცირებული პორტფელი აქვს, რომელიც ლუდსა და უალკოჰოლო სასმელებს მოიცავს. ქარხანაში ხდება როგორც ადგილობრივი, ისე ლიცენზირებული ბრენდების წარმოება.
კომპანიის ძირითადი პროდუქტებია:
- ლუდის ადგილობრივი ბრენდები: „ზედაზენი”,„რავი“, „აია“ და ა.შ.;
- ლუდის ლიცენზირებული ბრენდები: „ბავარია“, „ჰოლსტენი“, ”ჰარპი“, „რაგნარი“ და ა.შ.;
- ლუდის იმპორტირებული ბრენდები: „გინესი“, „გრიმბერგენი და ა.შ.;
- ლიმონათი ”ზედაზენი“ სხვადასხვა გემოთი (მსხალი, ლიმონი, ტარხუნა და ა.შ.);
- ნატურალური წვენი „ჩერო“-ს სხვადასხვა სახეობა (ფორთოხალი მანდარინით, ალუბალი,
ბროწეული და ა.შ.);
- RC კოლა (კოლას ტიპის სასმელი);
- ენერგეტიკული სასმელები („რედ რეინი“, „უაილდერი“,“დინო“);
- ცივი ჩაი სხვადასხვა არომატით;
- არომატული წყალი „ჩერო“-ს სხვადასხვა სახეობა (მარწყვი, ვაშლი, გრეიფრუტი, ლიმონი);
- წყალი „აქუა ზენი“.
ბაჩო ადამია
ზედაზენი
