„ზერო ეფექტი“ ნული ნარჩენის პირველი წრიული პრინციპის სოციალური სივრცეა საქართველოში, რომელიც ნული ნარჩენის მაღაზიას, შემეცნებით აქტივობებს, ძველი ნივთების გაცვლის სივრცეს, მინი მწვანე ბიბლიოთეკას და ნარჩენების შეგროვების პუნქტს მოიცავს.
„ზერო ეფექტის“ მაღაზიაში ბევრ საინტერესო ნივთს აღმოაჩენთ. ყველა მათგანი ეკოლოგიურად სუფთაა, ნატურალური ინგრედიენტებითა და მასალებითაა შექმნილი. მათი უმრავლესობა კომპოსტირებადია და ნარჩენების გადამუშავების გზითაა მიღებული.
მაღაზიაში ნახავთ ბამბუკის დანა-ჩანგლის ნაკრებს, რომელიც 36 ლარი ღირს, ლავანდას შამპუნს (30 ლარი), ტუჩის ბალზამსა და დეოდორანტს (15-15 ლარი), მრავალჯერად ყურის ჩხირებს (12 ლარი), ბამბუკის კბილის ჯაგრისს (15 ლარი), მეტალის საწრუპს (7 ლარი), ტილოს ჩანთას (14 ლარი) და სხვა.
„ჩვენს მაღაზიაში ნივთები უმეტესად შეფუთვის გარეშეა, შეფუთული პროდუქტები 100% კომპოსტირებადია სახლის პირობებში, მარტივად გადამუშავდება ან უკვე გადამუშავებული მასალისგანაა შექმნილი. ვთანამშრომლობთ მწვანე მეწარმეებთან საქართველოში და მის გარეთ. მაღაზიაში მოქმედებს შეფუთვის დაბრუნების პრინციპი, რაც გულისხმობს, რომ შეფუთვას ვიბრუნებთ, თავიდან ვიყენებთ და მომხმარებელი არ იხდის შეფუთვის თანხას, შესაბამისად არ რჩება ნარჩენიც.
მაღაზიის გარდა ზერო ეფექტის სივრცეს აქვს შემეცნებითი ფუნქცია. აქ ხშირად ვმასპინძლობთ სხვადასხვა ტიპის ვორქშოფებს, თემატურ ფილმის ჩვენებებსა და დისკუსიებს, ვცდილობთ გავზარდოთ ინტერესი გარემოსდაცვით საკითხებზე“ - განაცხადა „ზერო ეფექტის დამფუძნებელმა ანი ჭყოიძემ „კომერსანტთან“ საუბრისას.
„ზერო ეფექტის“ გუნდმა ნარჩენების ნაგვად გადაქცევის თავიდან ასაცილებლად ნარჩენების ჩაბარების პუნქტი შექმნა, სადაც სტუმრებს სხვადასხვა ტიპის ნარჩენი მოაქვთ, რომელიც შემდეგ გადამუშავდება.
„რაც შეეხება ნარჩენებით ოთახს, გამომდინარე იქიდან რომ ვცდილობთ სივრცე თავიდან ბოლომდე წრიული ეკონომიკის პრინციპებზე ავაწყოთ, გვინდოდა რომ ჩვენი სტუმრებისთვის შეგვეთავაზებინა მრავალფეროვანი საშუალება ნარჩენების ნაგვად გადაქცევის ასარიდებლად. მაღაზიაში არ გვაქვს ისეთი ნივთები რისი გადამუშავების, კომპოსტირების ან თავიდან გამოყენების შესაძლებლობაც არ აქვს მომხმარებელს.
ამ მიზნით შევქმენით ნარჩენების ჩაბარების პუნქტი, სადაც სტუმრებს მოაქვთ სხვადასხვა ტიპის ნარჩენი, მათი შემდგომი გადამუშავებისთვის. ვთანამშრომლობთ ისეთ კომპანიებთან როგორებიცაა „პოლივიმი, „სუფთა სამყარო, „მწვანე საჩუქარი და ორგანიზაცია „პარკი არ მინდა.
ამ ეტაპზე „ზერო ეფექტი“ იბარებს: პლასტმასას (მყარი პლასტმასას სახით), ალუმინს, ქაღალდს, აგრეთვე ძველ ქსოვილებს, დისკებს, ტექნიკის კაბელებს.
როგორც ნინი ჭყოიძემ გვითხრა, ჩასაბარებლად მოტანილ თითოეულ ნარჩენს თავისი მომზადების წესი აქვს. ფუნქციონირებს ასევე ნივთების გაცვლის სივრცე, სადაც მომხმარებელს შეუძლია ნებისმიერი გამოყენებადი ნივთი სხვა ნივთში გაცვალოს.