ერთ წელიწადში ზეთი თითქმის 20%-ით გაძვირდა. როგორც იმპორტიორები აცხადებენ, ამ პროდუქტის ფასმა გარკვეულ მაქსიმუმს უკვე მიაღწია და წესით, ფასმა არ უნდა მოიმატოს, თუკი ფორსმაჟორული სიტუაცია არ შეიქმნება. ასეთ საფრთხედ  ,,ალფას“ დამფუძნებელი, ზეთის იმპორტიორი კომპანია ,,ბარაქას“  დირექტორი გურამ ბროძელი გლობალურ პროცესებს მიიჩნევს, როგორიც შეიძლება იყოს, მაგალითად,  რუსეთ-უკრაინის მოსალოდნელი ომი ან ლარის გაუფასურება.

გარდა ამ სავარაუდო პროცესებისა,  ბროძელი ზეთის გაძვირებას არ ვარაუდობს და დასძენს, რომ ფასები ისედაც მაღალი მაჩვენებლით არის გაზრდილი, რის გამოც ზეთის რეალიზაცია შემცირდა.

,,დეფიციტი არ არის, მაგრამ წარმოების შემცირებას აქვს ადგილი და ყველაზე მეტად ფასმა ცხიმებსა და მარცვლეულზე მოიმატა, შესაბამისად, ყველა დასახელება გაძვირდა.  ამ პროცესს 2021 წელს ხელს უწყობდა ის გარემოებაც, რომ მოიმატა  საწვავის ფასმა, ლოგისტიკაც ძვირდება, რაც იმპორტული პროდუქტის ღირებულებაზე ნეგატიურად აისახება.  ბოლო პერიოდში ზეთის გაძვირებას უბიძგა რუსეთ-უკრაინის დაპირისპირებამაც, ამ ქვეყნებს შორის დაძაბულობამ საერთაშორისო ფასებმა უარყოფითად იმოქმედა, მათ შორის ზეთის ბაზარზეც. ვფიქრობ, მაქსიმუმი მიღწეულია და წელს ზეთის გაძვირება უნდა გაჩერდეს. ცხადია, ისევ გლობალური მოცემულობა თუ არ შეიცვლება და ლარის სტაბილურობას შეინარჩუნებს. ზოგადად, რთული ფონია, ფასების ზრდა გაყიდვებზეც მოქმედებს.  ზეთის რეალიზაცია 2021 წელს 15%-ით შემცირდა.  ახლა ყველაფერი ისევ გლობალურ პროცესებზეა დამოკიდებული“, - ამბობს  გურამ ბროძელი ,,კომერსანტთან“.

ცნობისთვის, სურსათისა და უალკოჰოლო სასმელების ჯგუფში ერთ-ერთი პროდუქტია ზეთი და ცხიმი, რომელიც 2021 წელს ყველაზე მეტად გაძვირდა. კერძოდ, ზრდა ამ მიმართულებით 19,6%-ს შეადგენს.

სტატისტიკის ეროვნული სამსახურის მონაცემით, იანვარში ინფლაციის დონემ გასული წლის ანალოგიურ პერიოდთან შედარებით 13.9% შეადგინა, ბოლო 12 თვეში კი სამომხმარებლო ფასები საშუალოდ 10.5%-ით გაიზარდა.

მარი ჩიტაია