„განმუხურის სანაპიროს განვითარება არ ხდება, არანაირი გასართობი არ არის, რაც აფერხებს სტუმრების დაინტერესებას, არ არის კლუბი, გვაქვს მხოლოდ აკვაპარკი,“ - ამის შესახებ „კომერსანტს“ ანაკლიის სასტუმროს Anaklia Resort by Pratap`s Signature-ის გენერალური მენეჯერი მაია მურაჩაშვილი ესაუბრა.

ანაკლიაში თითქმის ყველა სასტუმრო კოვიდპაციენტებისთვის იყო განკუთვნილი, ნაწილი კოვიდსასტუმროს ფუნქციას ივლისის ბოლომდე ითავსებს. Anaklia Resort by Pratap`s Signature–მ ჯავშნების მიღება დაიწყო, თუმცა როგორც მაია მურაჩაშვილი გვიყვება, დაინტერესება მხოლოდ კონფერენციების მოწყობის მსურველებისა და ადგილობრივი დამსვენებლებისგანაა, ევროპელ ტურისტებზე საუბარი კი ზედმეტია. ამის ერთერთ მიზეზად ეპიდსიტუაციის შემდეგ, ზღვისპირა ქალაქში გართობის საშუალებების არარსებობას ასახელებს.

„გაზი არ გვაქვს სასტუმროში, რაც სახელმწიფოს მოსაგვარებელია და მთლიანდ ელექტროენერგიაზე ვამუშავებთ სასტუმროს. როდესაც სასტუმრო აშენდა ინვესტორისთვის კომუნიკაციების ნაწილი სახელმწიფოს უნდა მოეგვარებინა,  ეს ჯერ კიდევ შეუსრულებელია. ყველასთვის გვაქვს ინფორმაცია მიწოდებული,  მაგრამ არანაირი სიახლე ჯერჯერობით არ გვაქვს. აქტიურ კამპანიას ვაწარმოებთ ჩვენი სოციალური ქსელებით და საკმაოდ აქტიურად წამოვიდა ჯავშნები, თუმცა ძირითადად ადგილობრივი დამსვენებლებისა და ორგანიზაციებისგან, რომელთაც კონფერენციების ჩატარება უნდათ.  ძირითადად, ჩვენი დამსვენებელი იყო აზერბაიჯანი, სომხეთი და რუსეთიდან. ახლა რუსეთი აქტიურობს, მაგრამ ივლისის მეორე ნახევარში.  გაჩნდა სპარსეთის ყურის ქვეყნებიდან მოთხოვნა, სამწუხაროდ ევროპა საერთოდ აღარ ჩანს იმიტომ, რომ ჯერ კიდევ მეოთხე კატეგორიის ქვეყნად ვითვლებით ევროპა-ამერიკისთვის, სადაც ეუბნებიან, რომ კოვიდსიტუაცია უსაფრთხო არ არის და აცრა მასიური სახის არ არის. აგვისტოში სამდღიანი ფესტივალი გაიმართება ანაკლიაში, თუმცა სამი დღის იმედად ბიზნესი ვერ იქნება. დაგეგმილია ინფოტურები მუნიციპალიტეტიდან ტურისტული კუთხით და ვნახოთ რა შედეგი ექნება,“ - ამბობს სასტუმროს მენეჯერი.

Anaklia Resort by Pratap`s Signature-ის სასტუმრო, რომელიც სანაპიროს პირველ ზოლშია, ცნობილი საერთაშორისო მუსიკალური ფესტივალის Echo Waves და Gemfest-ის მთავარი სცენის წინ მდებარეობს.  56–ნომრიანი სასტუმრო Anaklia Resort Pratap’s Signature  განმუხურში ინდური ინვესტიციით გახსნილი 5–ვარსკვლავიანი კოტეჯური კონცეფციის სასტუმროა, რომლის მშენებლობაშიც $10 მლნ–ზე მეტი ინვესტიცია განხორციელდა.

მარიამ მორგოშია