პოსტპანდემიურ პერიოდში საქართველოს ტურიზმის გადარჩენის ერთადერთი გზა შიდა ტურიზმია. საქართველოს მთავრობა ცდილობს მოსახლეობას ტრადიციულ ტურისტულ მიმართულებებთან ერთად, სხვადასხვა საინტერესო ტურისტული ადგილები შესთავაზოს. რეგიონების სასტუმროებიც ცდილობენ სხვადასხვა სახის შეთავაზებებით და ფასდაკლებებით მიიზიდონ ქართველი დამსვენებლები, თუმცა შავიზღვისპირეთის რეგიონი წლევანდელ სეზონს მაინც გაზრდილი ფასებით ხვდება.
კომპანია „რემაქსის“ ხელმძღვანელი მარიამ ასათიანი „კომერსანტთან“ საუბრისას აღნიშნავს, რომ ზღვისპირა რეგიონში სასტუმროებზე მომატებული ფასები მხოლოდ დროებითია და როგორც კი მიხვდებიან რომ მოთხოვნა არ არის, ფასდაკლებები დაიწყება.
„ზღვისპირა რეგიონში შიდა ტურიზმიდან მოთხოვნა იმდენად არ იყო და ძირითადად უცხოელ ვიზიტორებზე იყო გათვლა, თუმცა ახლა ბინების და სასტუმროების ქირაობაზე მოთხოვნა გაიზარდა. სასტუმროები რომლებიც ამუშავდა რა თქმა უნდა შიდა ტურისტებით არის დატვირთული, ასევეა ბინების დაქირავებაზეც. იმ ადამიანებისთვის, რომლებიც საზღვარგარეთ გადიოდნენ ახლა ერთადერთი დასვენების საშუალება შიდა ტურიზმია და შესაბამისად მოთხოვნა ზღვისპირეთის სასტუმროებზეც მოიმატებს. თუმცა, არმგონია რომ ეს მომატებული ფასები შენარჩუნდეს, რადგან შიდა ტურიზმი ვერასოდეს ჩაანაცვლებს გარე ტურიზმს, შესაბამისად ფასების კლება დაფიქსირდება, როგორც კი დაინახავენ რომ მოთხოვნა არც ისე დიდია“, - აცხადებს მარიამ ასათიანი.
Myhome-ის პროექტის ხელმძღვანელი მადონა კაჭკაჭაშვილი „კომერსანტთან“ საუბრისას აღნიშნავს, რომ ზღვისპირეთში ამ სეზონს გამქირავებლები მოლოდინის თვალით უყურებენ და ივლისის დასაწყისში დაფიქსირებული მოთხოვნის შესაბამისად მოახდენენ ფასების დაწესებას.
„Myhome-ზე განთავსებული შეთავაზებების გათვალისწინებით, არსებული მდგომარეობით, ზღვისპირა რეგიონში, ჯერჯერობით არ არის დაფიქსირებული ფასების ზრდის ტენდენცია. სავარაუდოდ, გამქირავებლები მოლოდინის თვალით უყურებენ მოცემულ სეზონს და ივლისის დასაწყისში დაფიქსირებული მოთხოვნის შესაბამისად, მოახდენენ ფასების მიმართულებით რეაგირებასაც. ივლისის შუა რიცხვებისათვის უკვე სეზონის შესაბამისი ტრენდიც დაფიქსირებული იქნება“, - განმარტა მადონა კაჭკაჭაშვილმა.
„თიბისი კაპიტალის“ მიერ გამოქვეყნებული ინფორმაციის მიხედვით, მარტის შემდეგ გაკეთებული ჯავშნები, რეგიონის სასტუმროებისთვის არსებული ჯავშნების დაახლოებით 75%-ს შეადგენს, ბათუმში 50%-მდეა, ხოლო 20%-ზე ნაკლებია თბილისის სასტუმროებისთვის. ივლისის თვის მიმდინარე ჯავშნების მიხედვით ბათუმში დატვირთულობა მხოლოდ 6%-ია. გამოკითხულ სასტუმროებში დატვირთულობა მაღალია მომდევნო თვეებში, მაგრამ მათი დიდი ნაწილი მოსალოდნელია გაუქმდეს ვინაიდან ჯავშნების უმეტესობა COVID-19-მდე პერიოდშია განხორციელებული. რეგიონის სასტუმროების საშუალო დღიური ფასი ივლისში 50%-მდეა შემცირებული, მაგრამ ბათუმში შედარებით მცირე და იშვიათი ფასდაკლებები ფიქსირდება.
ნინო თამაზაშვილი