მწარმოებლების ნაწილი პურის ფასს ამცირებს, ამის მიზეზი კი ქვეყანაში ფქვილის ფასისი მნიშვნელოვანი გაიაფებაა. ირკვევა, რომ ბოლო 1,5 თვის განმავლობაში საქართველოში 1 ტომარა ფქვილის ფასი 10 ლარით დაეცა.

როგორც „კომერსანტთან“ ხორბლისა და ფქვილის მწარმოებელთა ასოციაციის ხელმძღვანელმა ლევან სილაგავამ განაცხადა, დღეს ფქვილის ფასი ხარისხის მიხედვით 71-73 ლარია. 1,5 თვის წინ კი ფასი 82 ლარი იყო.

პურის მცხობელთა ასოციაციის ხელმძღვანელის მალხაზ დოლიძის თქმით კი რამდენიმე სახეობის პურზე დღეიდან ფასი 10 თეთრით შემცირდება. მისი განმარტებით, დღეიდან თბილისში 2 კომპანია 4 სახეობის პურზე ფასს დაწევს, რეგიონებში კი ფასი 10 თეთრით უკვე შემცირდა.

რაც შეეხება დასავლეთ საქართველოს, კომპანია „ბარაქაში", რომელიც წისქვილ-კომბინატს და პურის საწარმოს ფლობს „კომერსანტს“ უთხრეს, რომ ე.წ. სოციალური პურის ფასი 10 დღის უკან, 10 თეთრით დაწიეს. კომპანია მარკეტებს პურს შესაბამისად 70 თეთრად აბარებს. 

პურის ფასის შემცირება უმეტესწილად ფქვილის გაიაფებას უკავშირდება. ერთი მხრივ, რუსეთში ჭარბი მოსავლიანობისა და მეორე მხრივ, უკრაინის დერეფნის გახსნის გამო, რუსეთში მარცვლეულზე საექსპორტო მცურავი გადასახადი 45 დოლარამდე შემცირდა და სამომავლოდ შესაძლოა საერთოდ გაუქმდეს. აღნიშნულის შესახებ მოთხოვნა ბიზნესმა ქვეყნის პრეზიდენტს უკვე გაუგზავნა.