ზუგდიდში, დადიანების სასახლის გვერდით ზვიად გამსახურდიას სახელობის საპრეზიდენტო ბიბლიოთეკის, მუზეუმისა და ახალგაზრდული ცენტრის მშენებლობაზე ტენდერი მეორედ გამოცხადდა. მიუხედავად იმისა, რომ ტექნიკური დავალება შეცვლილი არ არის, ფასი 5 341 504 ლარითაა გაზრდილი. გასული წლის ივლისში გამოცხადებული შესყიდვის სავარაუდო ღირებულება 12 824 350 ლარი იყო, ამჯერად თანხა 18 165 854 ლარს შეადგენს.
სივრცე 2500 კვადრატულ მეტრს მოიცავს და დადიანების პარკის ნაწილი იქნება. ორსართულიან შენობაში კი მოეწყობა ბიბლიოთეკის არქივი, საგამოფენო სივრცე, საინფორმაციო ცენტრი ტურისტებისთვის, სივრცე ინტერაქციული სწავლებისთვის, საკონფერენციო დარბაზები, კაფე და ვერანდა.
განმარტებითი ბარათის მიხვედით, ახალგაზრდული ცენტრის, ბიბლიოთეკისა და მუზეუმის კონცეფცია გულისხმობს ისეთი თანამედროვე სივრცის შექმნას, რომელიც ადგილობრივ მოსახლეობას, განსაკუთრებით ახალგაზრდებს შეუქმნის განვითარების, საკუთარი იდეების დამუშავების, მათი წარდგენის, სიახლეების დანერგვის მეტ საშუალებას.
ახალგაზრდული ცენტრი სამეგრელო-ზემო სვანეთის რეგიონში ინფრასტრუქტურის განვითარების პროგრამის ფარგლებში აშენდება. ამ პროექტისთვის საქართველოს მთავრობამ სესხი აზიის განვითარების ბანკისგან მიიღო.
აღსანიშნავია, რომ 2021 წელს გამოცხადებულ ტენდერში მონაწილეობა ოთხმა ბიზნეს სუბიექტმა მიიღო, თუმცა ტექნიკური დოკუმენტაციის გამო ოთხივე პრეტენდენტი დისკვალიფიცირდა.
ბაჩო ადამია