ანალიტიკოს ზურაბ კუკულაძის განცხადებით, აზარტული თამაშების ბიზნესის შეზღუდვა საქართველოს ეკონომიკისთვის „ძალიან დიდი ეფექტის მომტანი იქნება“.
როგორც კუკულაძემ ონლაინ კაზინოებთან დაკავშირებით მთავრობის ინიციატივის შეფასებისას „ინტერპრესნიუსს“ განუცხადა, ეს ქვეყნისთვის „კარგის მეტს არაფერს მოიტანს“ და თუ ეს სისტემა შეიზღუდება, ქვეყნის ბიუჯეტი შემოსავალს, პრაქტიკულად არ დაკარგავს.
მისივე თქმით, თანხები, რაც აზარტულ თამაშებში იხარჯება, სხვა სექტორებში გადაინაცვლებს და ქართული ეკონომიკისთვის ერთგვარი შიდა ინვესტიცია იქნება.
„მთელი ეს პერიოდი, ბოლო წლები ვამტკიცებ იმას, რომ აზარტული თამაშების შეზღუდვა და თუ შესაძლებელი იქნება, გაუქმება, კარგის მეტს არაფერს მოიტანს. შესაბამისად, თუ ეს ინიციატივა განხორციელდება, ჩვენი ქვეყნის ეკონომიკისთვის ძალიან დიდი ეფექტის მომტანი იქნება.
რაც შეეხება არგუმენტებს იმის შესახებ, როგორ ჩანაცვლდება საბიუჯეტო შემოსავალი, რასაც აზარტული თამაშების ბიზნესი ახორციელებს, ამაზე მარტივი პასუხი არსებობს. გამომდინარე იქიდან, რომ აზარტული თამაშები გართობის სფეროა, ეს საქართველოს ეკონომიკისთვის და შესაბამისად, საქართველოს მოქალაქეებისთვის, მხოლოდ ხარჯია. ამ ხარჯს მაინც გასწევენ საქართველოს მოქალაქეები და თუ ეს არ იქნება აზარტული თამაშები, ანუ გართობის სფერო, ეს იქნება რეალური სექტორი. ნებისმიერ სხვა სექტორში აუცილებლად დაიხარჯება ეს ფული და გადასახადები იქიდან წავა ბიუჯეტში. ეს არანაირი პრობლემის მომტანი არ იქნება. თუ ეს სისტემა შეიზღუდება, ბიუჯეტი შემოსავალს, პრაქტიკულად არ დაკარგავს. უბრალოდ, შეიცვლება შემოსავლების სტრუქტურა ბიუჯეტში.
წარმოიდგინეთ, როდესაც ამხელა ფული იხარჯება გართობის სექტორში, ამით ხომ მომხმარებელი არაფერს იღებს, ეს ფული ჰაერში მიდის. პროდუქტი, თანხის ხარჯვის შედეგად არ იქმნება. თუ ეს ფული სხვა სექტორში გადაინაცვლებს, პირობითად კარტოფილის მოხმარებაზე, კარტოფილის მწარმოებლების ბიზნესი გაიზრდება.
ესაა მარტივი ლოგიკა იმასთან დაკავშირებით, როგორ შეიძლება იყოს ამ სისტემის შეზღუდა ეკონომიკისთვის მომგებიანი. ეს იქნება ძალიან დიდი ერთგვარი შიდა ინვესტიცია ქართული ეკონომიკისთვის. ვგულისხმობ იმ ფულს, რომელიც აზარტული თამაშების ბიზნესიდან გამოთავისუფლდება“,- განაცხადა ზურაბ კუკულაძემ.
რაც შეეხება მთავრობის მიერ დაანონსებულ სოციალურ პროგრამას, რომლის მიხედვითაც სოციალურად დაუცველ შრომისუნარიან მოქალაქეებს სამუშაო ადგილებს შესთავაზებენ, ზურაბ კუკულაძე ამბობს, რომ „სოციალური დახმარების ის სისტემა, რაც დღეს მოქმედებს, ეფექტიანი არაა“.
„ჯერჯერობით ზუსტად არ ვიცით, რაზეა საუბარი, მაგრამ ფაქტია, რომ სოციალური დახმარების ის სისტემა, რაც დღეს მოქმედებს, ეფექტიანი არაა. ადამიანებს ურჩევნიათ ლეგალური შემოსავლის არმიღება, რათა სოციალური დახმარება არ დაკარგონ“,- განაცხადა ზურაბ კუკულაძემ.
ცნობისთვის, საქართველოს პრემიერ-მინისტრის, ირაკლი ღარიბაშვილის განცხადებით, პირველ ეტაპზე იგეგმება ონლაინ კაზინოების მფლობელებისთვის გადასახადის გაზრდა, რეკლამის აკრძალვა, მომხმარებლების ასაკობრივი ზღვარი 25 წლამდე აიწევა, ხოლო მეორე ეტაპზე, დაგეგმილია ასევე ონლაინ კაზინოების სრულად აკრძალვაც. ამის შესახებ პრემიერმა მთავრობის სხდომაზე განაცხადა.
მთავრობის კიდევ ერთი ინიციატივა კი სოციალურად დაუცველ მოქალაქეებს ეხება.
„სოციალური დახმარების ნაცვლად შრომისუნარიან მოქალაქეებს სამუშაო ადგილები უნდა შევთავაზოთ, ამაზე მუშაობა დაწყებული გვაქვს და უახლოეს რამდენიმე კვირაში საზოგადოებას წარვუდგენთ უკვე აპრობირებულ პროგრამას, რომელიც ევროპის წარმატებულ ქვეყნებშია გამოცდილი“,- განაცხადა პრემიერმა.
ipn.ge