„რუსეთის მიმართ სანქციურ ზემოქმედებას ჯერ პიკისთვის არ მიუღწევია“, - ამის შესახებ ჯიპას პროფესორმა, რონდელის ფონდის წამყვანმა მკვლევარმა მერაბ კაკულიამ რადიო „პალიტრისა“ და „პალიტრანიუსის“ გადაცემაში „საქმე“ განაცხადა.
მისი თქმით, რუსეთისთვის ყველაზე მტკივნეული დარტყმა ნავთობპროდუქტებზე ემბარგოს დაწესება იქნება, რაზეც ევროკავშირის წრეებში უკვე საკმაოდ აქტიურად საუბრობენ.
„რუსეთის მიმართ სანქციურ ზემოქმედებას ჯერ პიკისთვის არ მიუღწევია. ყველაზე მნიშვნელოვანი და რუსეთის ეკონომიკისთვის მტკივნეული გადაწყვეტილება, რომლისკენაც ლოგიკურად მიდის საერთაშორისო კონსოლიდაციის პროცესი, ის იქნება, როდესაც გამოცხადდება ემბარგო ნავთობპროდუქტებზე. ანუ, ამით რუსეთს შეეზღუდება საშუალება, რომ ყოველდღიურად დაახლოებით, 800 მლნ-დან 1 მლრდ დოლარამდე მიიღოს და ამით შეძლოს გარკვეული ნეიტრალიზაცია გააკეთოს იმ უარყოფითი შედეგების, რაც უკვე დაწესებულმა სანქციებმა ამ ქვეყანას მიაყენა. ანუ, მთავარი და ყველაზე უფრო მტკივნეული მაინც იქნება ემბარგოს გამოცხადება ნავთობპროდუქტების ექსპორტზე.
ეს ძალიან სენსიტიური თემაა და მოგეხსენებათ, ბევრი მოწინააღმდეგე ჰყავს დასავლეთის საზოგადოებაში. მაგალითად, იგივე, გერმანიის ფედერაციული რესპუბლიკა, მართალია იგი ვერბალურად ადასტურებს თავის ძალიან მკაცრ პოზიციას რუსეთის მიმართ და იმედს იძლევა, რომ სანქციებს სრულფასოვნად შეუერთდება, მან ამ მიმართულებით რამდენიმე ძალიან შთამბეჭდავი ნაბიჯიც გადადგა, მაგრამ ამ გადაწყვეტილების მიღება, საბოლოოდ ალბათ, საკმაოდ რთული იქნება. თუმცა, ისიც უნდა აღინიშნოს, რომ ევროკავშირის წრეებში უკვე ინტენსიურად მიდის ამაზე საუბარი და სანქციების მეშვიდე პაკეტში ამ მიმართულებით იქნება სერიოზული ნაბიჯები გადადგმული“,- განაცხადა მერაბ კაკულიამ.
რაც შეეხება რუს ოლიგარქებს და მათ მიმართ დაწესებულ სანქციებს, როგორც მერაბ კაკულიამ აღნიშნა, მათთვის სიმდიდრის წყაროდ რუსეთი რჩება. შესაბამისად, სანქციები გრძელვადიან პერსპექტივაში, სერიოზულ შედეგებს გამოიღებს.
„რაც შეეხება ოლიგარქებს, მართალია, მათ სხვა ქვეყნების ეკონომიკებში საკმაოდ სერიოზული ინტერესები გააჩნიათ, მაგრამ მათი სიმდიდრის წყარო იყო და რჩება რუსეთის ეკონომიკა, რომელიც არის რესურსებზე და ექსპორტზე ორიენტირებული. ამ ოლიგარქებს და მათ შორის, რომან აბრამოვიჩს, ძალიან სერიოზული კაპიტალი აქვს დაბანდებული ამ სექტორებში. ასე რომ, ოლიგარქები, რუსეთის ეკონომიკის გარეშე არ არსებობენ. მათი შევიწროვების სტრატეგია მართალია, გრძელვადიანია, მაგრამ ვფიქრობ, რომ სერიოზულ შედეგებს გამოიღებს.
მე ღრმად ვარ დარწმუნებული და ამას არაერთი საერთაშორისო გამოცემა (ასევე, არაერთი ეკონომისტი, ვინც ჩახედულია რუსეთის ეკონომიკურ სივრცეში) აღნიშნავს, რომ ზუსტად ამ ოლიგარქებთან უნდა ვეძიოთ ის კუდები, რომელსაც ტოვებს რუსეთის პრეზიდენტი და მისი ახლო გარემოცვის მრავალმილიარდიანი აქტივები. იმიტომ, რომ ღია წყაროებით მათი პოვნა შეუძლებელია. არ უნდა დაგვავიწყდეს, რა პროფესიის არის რუსეთის პრეზიდენტი და რა გამოცდილების ადამიანები ახვევია გარს. შეიძლება ვივარაუდოთ, რომ ისინი საგულდაგულოდ მალავენ იმას, რაც გააჩნიათ“,- განაცხადა მერაბ კაკულიამ.