ბაღდათის მუნიციპალიტეტში, სოფელ ვარციხეში მეოცე საუკუნეში ფრანგი ძმების, ანანოვების მიერ აგებული ისტორიული შენობა, რომელიც ერთ დროს სამთავრობო რეზიდენციის ფუნქციასაც ასრულებდა, ისევ ახალი სიცოცხლის მოლოდინშია. წლების განმავლობაში სასახლემ ძალიან ბევრი მფლობელი გამოიცვალა, ბოლოს ანანოვების მამული 2020 წლის იანვარში 1 375 000 ლარად შპს „ინვესტ ჯგუფმა“ საინვესტიციო ვალდებულებით შეისყიდა.
ხელშეკრულების გაფორმებიდან დაახლოებით ორ წელიწად-ნახევარი გავიდა, თუმცა საქართველოს მთავრობის გეგმები ამ ეტაპზე არ გამართლდა. პრივატიზების შედეგად ანანოვების სასახლეს არც რეგიონის ეკონომიკური გამოცოცხლებისთვის შეუწყვია ხელი და არც მნიშვნელოვანი ტურისტული ლოკაცია გამხდარა.
„კომერსანტი“ დაინტერესდა, როგორ მიმდინარეობს ისტორიულ ტერიტორიაზე ტურისტული ინფრასტრუქტურის მოეწყობა, თუმცა „ინვესტ ჯგუფის“ გენერალური დირექტორმა დავით კობახიძემ მედიაჰოლდინგის ზარს არ უპასუხა. ამის შემდეგ ინფორმაცია სახელმწიფო ქონების ეროვნული სააგენტოსგან გამოვითხოვეთ. სწორედ ეს სახელმწიფო უწყება ატარებს მის მიერ საინვესტიციო ვალდებულებით გასხვისებული ქონების მონიტორინგს, თუ როგორ ასრულებს მყიდველი ნაკისრ ვალდებულებებს.
აღსანიშნავია, რომ სახელმწიფო ქონების ეროვნული სააგენტოსგან მიღებული პასუხი 2021 წელს მიღებული ინფორმაციის იდენტურია. რომ „ინვესტ ჯგუფი“ გადაცემულ უძრავ ქონებაზე არსებული კულტურული მემკვიდრეობის ძეგლის სტატუსის მქონე შენობა-ნაგებობის მოვლა-პატრონობის ვალდებულებას ასრულებს, რომ გასუფთავდა გარე ტერიტორია ნაგვისგან და ეკალ-ბარდებისგან. უწყების ინფორმაციით ორ წელიწად-ნახევარია რაც გარე ტერიტორიის მოწესრიგების და ხე-მცენარეების შეწამვლის სამუშაოები მიმდინარეობს. მათი ინფორმაციით, 2020 წელს ლანდშაფტურ და სხვა სამუშაოებზე დაახლოებით 100 000 ლარი დაიხარჯა. ქონების ეროვნული სააგენტო უკვე მეორედ გვწერს, რომ კომპანიის დაწყებული აქვს მუშაობა ტურისტული ცენტრის კონცეპტის დამუშავებაზე და მიმდინარეობს მოლაპარაკებები საერთაშორისო პარტნიორებთან. ჩვენ ვიკითხეთ ისიც, თუ ბოლოს როდის მოახდინეს გასხვისებული ქონების მონიტორინგი, რაზეც აცხადებენ, რომ დათვალიერება 2022 წლის 21 თებერვალს განხორციელდა. მაგრამ, 2021-22 წლებში გადადგმულ კონკრეტულ ნაბიჯებზე არაფერს ამბობენ. თუმცა აცხადებენ, რომ სხვა ვალდებულებების შესრულების ვადა ჯერ არ დამდგარა.
„გაცნობებთ, რომ ხელშეკრულებით გათვალისწინებული ვალდებულებების შესრულება დასტურდება ვალდებულებების შესრულების ვადის ამოწურვის შემდგომ კომპანიის მიერ წარმოდგენილი აუდიტორული დასკვნის საფუძველზე. გაცნობებთ, რომ მიმდინარე ეტაპზე ვალდებულებების შესრულების დამადასტურებელი აუდიტორული დასკვნის წარმოდგენის ვადა არ დამდგარა“, - აცხადებენ უწყებაში.
შეგახსენებთ, რომ საპრივატიზებო პირობის მიხედვით არაუგვიანეს 2024 წლის 26 თებერვლისა კომპანიამ უნდა უზრუნველყოს ტურისტული ცენტრის შექმნა, ფუნქციონირების დაწყება და 4 000 000 ლარის ინვესტირება. ტურისტული ცენტრი უნდა მოიცავდეს ალკოჰოლური სასმელების საჩვენებელ/საგამოფენო სივრცეს, რეკრეაციულ სივრცეს/მრავალწლიან ნარგავებს, სპორტულ მოედანს და 6–ნომრიან სასტუმროს.
აუქციონის პირობების მიხედვით ტურისტული ცენტრი შექმნიდან 10 წლის განმავლობაში უნდა ფუნქციონირებდეს. ტურისტული ცენტრის შექმნიდან 2 თვის ვადაში, 2 წლის ვადით ცენტრში არანაკლებ 20 ადამიანი უნდა დასაქმდეს. 26.02.2035 წლამდე არ განახორციელოს უძრავ ქონებაზე საცხოვრებელი სახლ(ებ)ის მშენებლობა და ასევე, უძრავ ქონებაზე არსებული შენობების საცხოვრებელი მიზნებისათვის გამოყენება.
შეგახსენებთ, რომ 77 500 კვ.მ. მიწის ნაკვეთი და მასზე განთავსებული ისტორიული ნაგებობა ბიზნესმენების ძმები დუგლაძეების საკუთრებაში გადავიდა. სამეწარმეო რეესტრში დუგლაძეების სახელი არ ფიქსირდება. დოკუმენტებში შპს „ინვესტ ჯგუფის“ 100%-იანი წილის მფლობელი ნინო ლორთქიფანიძეა, თუმცა გავრცელებული ინფორმაციით, სწორედ ნინო ლორთქიფანიძეა ბიზნესმენ დუგლაძეებთან დაკავშირებული. კომპანიის დირექტორი დავით კობახიძე „კომერსანტთან“ აცხადებდა, რომ შპს „ინვესტ ჯგუფი“ დამოუკიდებელი კომპანიაა და ის არანაირ კავშირში არ არის არც ერთ სხვა ბიზნეს ჯგუფთან, მათ შორის, არც დუგლაძეების ღვინის კომპანიასთან.
იმერეთში, ბაღდათის რაიონში, სოფელ ვარციხეში ანანოვების ყოფილი სასახლის გასაყიდად საჯარო აუქციონი 2019 წლის 31 დეკემბერს გამოცხადდა. ისტორიული ნაგებობა კი 2019 წლის 31 დეკემბერს რეგისტრირებულმა კომპანია შპს ინვესტ ჯგუფმა შეიძინა. ანანოვების მიერ აგებული შენობა, თავდაპირველად საცხოვრებელი სახლი იყო, მოგვიანებით სასტუმროდ გადაკეთდა და ბოლოს სამთავრობო რეზიდენციის ფუნქცია შეიძინა. მოგვიანებით, ცნობილ მეღვინეებსა და ხის გადამამუშავებელი საწარმოს მფლობელებს ქონება ჩამოართვეს და სახელმწიფოს გადასცეს. სასახლის ისტორია საინტერესო განსაკუთრებით მას შემდეგ გახდა, რაც გასული საუკუნის 90-იან წლებში მას სამთავრობო რეზიდენციის სტატუსი მიენიჭა, წლების მანძილზე რეზიდენცია უმაღლესი რანგის სტუმრებს მასპინძლობდა. სამთავრობო რეზიდენციამ 2012 წლიდან პატრიოტთა ბანაკის ფუნქცია შეიძინა, ეს სტატუსი ანანოვების სასახლეს 2014 წლამდე ჰქონდა, ხოლო მას შემდეგ ქონება ეკონომიკის სამინისტროს ბალანსზე ფიქსირდებოდა.
ბაჩო ადამია