პატიმრობაში მყოფი რუსი ოპოზიციონერი ალექსეი ნავალნი წერს, რომ 2008 წელს, ქართველების მიმართ შეურაცხმყოფელი პოსტი იმ ფაქტის გავლენით დავწერა, რომ მისი მეგობარი ცხინვალში იბომბებოდა. 

„მინდა ვისაუბრო მიხეილ სააკაშვილზე.

მას არ ვიცნობ და არასდროს შევხვედრილვარ. არც მის გუნდში ვიცნობ ვინმეს და ამ პოსტიც დაწერაც არავის უთხოვია.

მე, ჩემდა სამარცხვინოდ, საკმაოდ სუსტი წარმოდგენა მაქვს ქართულ პოლიტიკაზე და შეიძლება რამე არასწორად ვთქვა. კიდევ უფრო მეტად ჩემდა სამარცხვინოდ, იმის გავლენით, რომ ჩემი მეგობარი ცხინვალში იყო დაბომბვის ქვეშ, 2008 წელს დავწერე პოსტი ქართველების მისამართით შეურაცხმყოფელი ეპითეტებით. ამის გამო ბოდიში მოვიხადე და კიდევ ერთხელ ვიხდი ბოდიშს, მაგრამ ვიცი, რომ ამის გამო ჩემს აზრს საქართველოში არც ისე დიდი წონა აქვს.

თუმცა, გადავწყვიტე დამეწერა, როგორც ადამიანს და ქრისტიანს, რადგან ეს ძნელი საყურებელია.

სააკაშვილი იტანჯება, მისი ოჯახი იტანჯება და მთელი საქართველო ცუდადაა იმის გამო, რაც ხდება და ამაში კარგი არაფერია მათთვისაც კი, ვისაც სურს სააკაშვილის ციხეში ყოფნა  სიკვდილამდე.

მე მჯერა საქართველოს ბედნიერი ევროპული მომავლის. ეს არის მაგარი ქვეყანა, რომელსაც აქვს ყველაფერი კეთილდღეობისთვის. მჯერა, რომ პოლიტიკური დაპირისპირება (და სად არაა ის?) მშვიდობიანად და უსაფრთხოდ მოგვარდება.

მაგრამ ყოფილი პრეზიდენტის ეს პატიმრობა და ტანჯვა საშინელი და უგულოა. ეს ურტყამს ევროპულ არჩევანს, ურტყამს განვითარებას, ამცირებს ნორმალური მომავლის შანსებს. ეს აქვეითებს მორალს და ავსებს ქვეყანას ბოროტებით.

გასაგებია, რომ ეს დაპირისპირება სასტიკია და სულის სიღრმემდე ემოციებით სავსე. ეჭვი არ მეპარება, რომ სააკაშვილის ოპონენტებს აქვთ მისთვის რაღაც, რასაც გაახსნებენ და რაღაც  რისთვისაც შურს იძიებენ.

აი ამის შესახებ მინდა თქმა. მინდა მოვუწოდო, თუ ვინმე გაიგებს. არ არის საჭირო შურისძიება, თუნდაც ძალიან გინდოდეს. ამ შურისძიებით მთელი საქართველო დაზარალდება. ეს არის ჩიხური გადაწყვეტილება,  სტრატეგიულად არახელსაყრელი ყველასთვის. და სასტიკი.

ჩვეულებისამებრ, ყველაფერი ეყრდნობოდა იმ ფაქტს, რომ ყველას სურს სახის შენარჩუნება,  ყველას უნდა აჩვენოს, რომ ის ვერ მოდრიკეს, პირიქით, ყველა მან მოდრიკა.

მაგრამ ხელისუფლება უფრო მოწყალე უნდა იყოს, ვიდრე მისი ოპონენტები. რადგან ისაა ხელისუფლება.

სააკაშვილი ძალიან ავად არის და სიმულაციაზე ყველა საუბარი სისულელეა. დამიჯერეთ, ციხე ნებისმიერისგან იწოვს ჯანმრთელობას და თან დიდი სისწრაფით. მისი პირობითი სასჯელით სამკურნალოდ გათავისუფლება, ან ისეთი რამის გაკეთება, რაც მხარეებს კანონის დაცვისა და სახის შენარჩუნების საშუალებას მისცემს - ეს იქნებოდა ყველაზე სწორი.

ახლა ვნების კვირაა, შემდეგ კი აღდგომა. კარგი დროა რთული, მაგრამ მოწყალე საქციელისთვის, ქვეყნის  საკეთილდღეოდ და ერის შერიგებისთვის ნაბიჯის გადასადგმელად.

მოვუწოდებ საქართველოს ხელისუფლებას და მიხეილ სააკაშვილის ყველა ოპონენტს, გადადგან ნაბიჯი ქრისტიანული წყალობისა და მშვიდობის დამყარების სულისკვეთებით.

ნეტარ არიან მოწყალენი, ვინაიდან ისინი შეწყალებულნი იქნებიან,“- წერს ნავალნი.

შეგახსენებთ, 2008 წლის ომისას ალექსეი ნავალნიმ ქართველები (გრუზინები) "გრიზუნებად" მოიხსენია, რაც მღრღნელებს ნიშნავს.