„ფლანგვის დეტექტორმა“ მორიგი კვლევა გამოაქვეყნა. არასამთავრობო ორგანიზაციის ინფორმაციით, 2020-2022 წლებში აფხაზეთის მთავრობის აპარატმა და ხუთმა სამინისტრომ ბიუჯეტის 70% - 5,588,640 ლარიდან 3,513,383 ხელფასებში დახარჯა.

„ფლანგვის დეტექტორის“ მონაცემებით, აფხაზეთი  მთავრობა ცენტრალური ბიუჯეტიდან  2020 წელს 19,080,780 ლარით დაფინანსდა;

2021 წელს - 20,770,000 ლარით;

2022 წელს - 23,500,000 ლარით.

„დაფინანსების უპირველესი მიზანი საქართველოში მცხოვრები 263,000 იძულებით გადაადგილებული პირის სოციალური დახმარება და ხელშეწყობა უნდა იყოს, აგრეთვე მათი ინტეგრაციისთვის მიმართული ნაბიჯები. თუმცა აფხაზეთის მთავრობის მიერ მოწოდებული ინფორმაციიდან ირკვევა, რომ საბიუჯეტო პრიორიტეტები სხვანაირად არის განაწილებული და ის ძირითადად მთავრობაში დასაქმებული ადამიანების შრომის ანაზღაურებაში იხარჯება,“ - წერს ფლანგვის დეტექტორი.

2020-2022 წლებში ხელფასებში მთავრობის აპარატმა 5,588,640 ლარიდან 3,513,383 ლარი - 63% დახარჯა;

ფინანსთა და ეკონომიკის სამინისტრომ - 4,089,672 ლარიდან 3,476,689 ლარი - 85%;

განათლებისა და კულტურის სამინისტრომ - 2,811,360 ლარიდან 2,136,229 ლარი - 76%;

ჯანმრთელობისა და სოციალური დაცვის სამინისტრომ - 1,952,475 ლარიდან 1,359,929 ლარი - 70%;

იძულებით გადაადგილებულ პირთა სამინისტრომ - 7,053,320 ლარიდან 4,681,600 ლარი - 66.3%;

იუსტიციისა და სამოქალაქო ინტეგრაციის სამინისტრომ - 2,816 ლარიდან 1,726,814 ლარი - 61.3%;

იმავე წლებში მთავრობის აპარატსა და სამინისტროებს საშუალოდ 26 მანქანა ემსახურებოდა, რომელთა საწვავის ხარჯმა 513,200 ლარი შეადგინა.

გამოდის, 5 სამინისტროსა და მთავრობის აპარატში 2020-2022 წლებში ბიუჯეტის 70% შრომის ანაზღაურებაში დაიხარჯა, წერს არასამთავრობო ორგანიზაცია. გამორჩეულია ფინანსთა და ეკონომიკის სამინისტროს 2021 წლის ხარჯი, რა დროსაც 1,518,445 ლარიდან 1,500,013 ლარი (99%) უწყებამ შრომის ანაზღაურებაში დახარჯა.

რაც შეეხება მთავრობის შემადგენლობის და მინისტრების შრომის ანაზღაურებას, ასეთია:

აფხაზეთის მთავრობის თავმჯდომარემ რუსლან აბაშიძემ 2020-2022 წლებში ხელფასის სახით -  249,150 ლარი მიიღო;

განათლებისა და კულტურის მინისტრმა ეკა ხოფერიამ - 143,450 ლარი;

ფინანსთა და ეკონომიკის მინისტრმა ლევან თევზაიამ - 137,600 ლარი;

ჯანმრთელობისა და სოციალური მინისტრმა ლევან ჩაკვეტაძემ - 141,631 ლარი;

იძულებით გადაადგილებულ პირთა მინისტრმა დავით ფაცაციამ - 138,243 ლარი;

იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ - 117,333 ლარი.

ფლანგვის დეტექტორი