„ფლანგვის დეტექტორმა“ მორიგი კვლევის შედეგები გამოაქვეყნა. არასამთავრობო ორგანიზაციის მონაცემებით, საჯარო მოხელეთა ხელფასები წელსაც იზრდება, ისევე როგორც საკრებულოს დაფინანსება, რომელიც 2023 წელს 722 400 ლარით გაიზარდა.

„ახალი, გაზრდილი ბიუჯეტით დაიწყო წელი თბილისის საკრებულომ. 2022 წლის გეგმის თანახმად, თბილისის საკრებულოს ბიუჯეტი 17,695,800 ლარით განისაზღვრა, ხოლო 2023 წლის ბიუჯეტი 18,418,200 ლარით. 13,765,400 ლარი შეადგინა საკრებულოს ფაქტობრივმა დაფინანსებამ 2021 წელს.

დაფინანსების ზრდის პარალელურად, ფლანგვის დეტექტორმა გადაწყვიტა შეეჯამებინა საკრებულოს საქმიანობა 2022 წელს. საკრებულოს წევრთა ძირითად ვალდებულებებს წარმოადგენს: აღმასრულებელი ორგანოსა და თანამდებობის პირების საქმიანობის კონტროლი, საკრებულოს უფლებამოსილებისათვის მიკუთვნებული ყველა საკითხის განხილვა. საკრებულოს წევრი საკუთარ უფლებამოსილებებს ახორციელებს საკრებულოს სხდომაზე. შესაბამისად, მასზე დაკისრებული ვალდებულების ჯეროვნად განსახორციელებლად, სულ მცირე, სხდომაზე დასწრებაა საჭირო.

2022 წლის განმავლობაში საკრებულოს 12 სხდომა გაიმართა. დედაქალაქის საკრებულო 50 წევრისგან შედგება. წლის მანძილზე საკრებულოს წევრთა სრული დასწრება არც ერთ სხდომაზე არ დაფიქსირებულა. 50 წევრიდან 17 წევრს საკრებულოს სხდომის არც ერთი გაცდენის შემთხვევა არ უფიქსირდება. ამ 17 წევრიდან მხოლოდ 4 წევრია ოპოზიციის წარმომადგენელი: საბა ბუაძე, ცოტნე კობერიძე და ალექსანდრე რატიაშვილი, რომელიც შემდგომში ნინო წულაძემ ჩაანაცვლა.

ჯამში წლის მანძილზე 86 გაცდენიდან 37 გაცდენა უფიქსირდება ქართული ოცნების წევრებს, 39 - ერთიან ნაციონალური მოძრაობის წევრებს, 9 - საქართველოსთვის წევრებს, ხოლო 1 გაცდენა ლელოს წევრებს. გაცდენების ყველაზე მაღალ მაჩვენებელს ქართული ოცნებისა და ერთიანი ნაციონალური მოძრაობის წევრები ინაწილებენ. აღსანიშნავია, რომ მაისის თვეში საკრებულოს ფრაქციამ “ერთიანი ნაციონალური მოძრაობა” ბოიკოტი გამოაცხადა და არ დაესწრო თბილისის საკრებულოს სხდომას.

რაც შეეხება გაცდენების ინდივიდუალურ მაჩვენებელს, 2022 წელს 12 სხდომიდან 7 სხდომას არ ესწრებოდა ენმ-ის წარმომადგენელი თორნიკე ბიკაშვილი, 7 სხდომას არ ესწრებოდა ქართული ოცნების წარმომადგენელი ნათია მოდებაძე, ხოლო მესამე ადგილს გაცდენების სიაში კვლავ ენმ-ს წევრი იკავებს - სოფიო ჯაფარიძე 5 სხდომას არ დაესწრო.