ტექნოლოგიური მარკეტინგის სააგენტო Codeword-ის ახალ კვლევაში ნათქვამია, რომ 2025 წლისთვის ხელოვნურმა ინტელექტმა შეიძლება 85 მლნ სამუშაო ადგილი ჩაანაცვლოს; New Scientist-ი იტყობინებოდა, რომ მსოფლიოში პირველმა რობოტმა სასამართლო პროცესზე ადვოკატის ფუნქცია შეასრულა; Codeword-მა პირველი ხელოვნური ინტელექტი სტაჟიორები - ეიდენი და აიკო აიყვანეს; ისრაელის პრეზიდენტს სიტყვა ნაწილობრივ ხელოვნურმა ინტელექტმა დაუწერა და ა.შ. ბოლო კვირებში არ დარჩენილა ალბათ არც ერთი ადგილობრივი და საერთაშორისო მედია, რომელსაც ხელოვნურ ინტელექტზე რამე არ დაეწეროს და ეთქვას
ჩაანაცვლებს ხელოვნური ინტელექტი ადამიანს? ხომ არ დავკარგავთ სამსახურს? ხომ არ ვიგრძნობთ თავს უსარგებლოდ?
Codeword-ი პრესრელიზში აცხადებს, რომ მათი ახალი სტაჟიორები რეალური ადამიანები კი არა, ხელოვნური ინტელექტები არიან და კომპიუტერის მიერ გენერირებული პროგრამული უზრუნველყოფის გამოყენებით მუშაობენ.
„ფაქტობრივად, სამომავლოდ სამუშაო ტექნოლოგიების ხელშია“, წერს Sky Magzines-ი ახალ კვლევასთან დაკავშირებულ სტატიაში.
„ბევრს საუბრობენ, შიში და აჟიოტაჟია იმის შესახებ, თუ როგორ მოხდება ახალი AI ინსტრუმენტების შემოქმედებით გუნდებთან გაერთიანება. გვინდა გამოვიკვლიოთ, როგორი შეიძლება იყოს ადამიანისა და ხელოვნური ინტელექტის თანამშრომლობა,“ - აცხადებს Codeword-ის პარტნიორი კაილ მონსონი.
სტაჟიორები ეიდენი და აიკო არა მხოლოდ შეუერთდნენ Codeword-ის გუნდს, მათ საკუთარი ვიზუალური პროექტებიც შექმნეს.
„მე შექმნილი ვარ იმისთვის, რომ ვიყო დამხმარე და ეფექტური. მე მჯერა, რომ შემიძლია ვიყო ღირებული რესურსი, როგორც „სტაჟიორი“, თუმცა ჩემი შესაძლებლობები გარკვეულწილად განსხვავდება ადამიანი სტაჟიორის შესაძლებლობებისგან,“ - ამბობს ეიდენი განცხადებაში.
ჩნდება კითხვა, შეიძლება თუ არა რომ AI-მ საფრთხე შეუქმნას ადამიანების სამუშაო ადგილებს?
მსოფლიო ეკონომიკური ფორუმი ვარაუდობს, რომ ხელოვნური ინტელექტი 2025 წლისთვის მთელ მსოფლიოში 85 მილიონ სამუშაო ადგილს ჩაანაცვლებს. გარდა ამისა, ორგანიზაცია „სამუშაოების მომავლის ანგარიში 2020“ ვარაუდობს, რომ ახალი ტექნოლოგია, მომდევნო რამდენიმე წლის განმავლობაში, 97 მლნ ახალ სამუშაო ადგილსაც შექმნის.