"5 პრემიერი, პარლამენტის 5 თავმჯდომარე 9 წელიწადში. რა სტაბილურობაზეა საუბარი, რა საგარეო ურთიერთობაზე, რა ეკონომიკურ პროგრამებზე, რა ინვესტიციაზე და რა სამუშაო ადგილებზე?" - ასეთ კითხვებს სვამს სოციალურ ქსელში პარტია "ლელოს" ლიდერი, მამუკა ხაზარაძე, რომლითაც ის პარლამენტის თავმჯდომარის პოსტზე კახა კუჭავას შალვა პაპუაშვილით ჩანაცვლებას გამოეხმაურა.
"რა ნიშნით ინიშნებიან, რის გამო თავისუფლდებიან? სად არის პროგრამა, სად არის ანგარიში? სად არის პასუხისმგებლობა? არაფერი ასეთი!
ასე ხდება მხოლოდ ისეთ ქვეყანაში, რომელშიც თავისუფლების გემო დავიწყებულია, რომელშიც ხმები იყიდება, რომელშიც სამართლიანი მართლმსაჯულება არ არსებობს, რომელშიც სამოქალაქო საზოგადოება დუმს, რომელშიც ქვეყნის თითქმის ყველა ინსტიტუცია მიტაცებულია ერთი კაცის მიერ...
ბრძოლა გრძელდება! ბრძოლა ამ მარაზმის დასამთავრებლად და ნამდვილი ქართული დემოკრატიული სახელმწიფოს ასაშენებლად," - წერს პარტია ლელოს ლიდერი, მამუკა ხაზარაძე. 24 დეკემბერს პარლამენტის თავმჯდომარე, კახა კუჭავამ თანამდებობა დატოვა, მმართველი პარტია ახალ თავმჯდომარედ განათლებისა და მეცნიერების კომიტეტის თავმჯდომარეს, შალვა პაპუაშვილს წარადგენს.