სახელმწიფო ქონების ეროვნული სააგენტოს საკუთარი მოხმარებისთვის ახალი პროგრამა ექნება, რისთვისაც ბიუჯეტიდან 897100 ევრო დაიხარჯება. ახალი პროგრამის შექმნაზე ABACO S.p.A იმუშავებს, ის მზად 8 თვეში იქნება და აღნიშნულ სერვისს კი ქონების ეროვნული სააგენტო გამარტივებული შესყიდვით შეიძენს.

როგორც სახელმწიფო შესყიდვების სააგენტოს ვებგვერდიდან ირკვევა, ქონების ეროვნული სააგენტოს საქმიანობის სპეციფიკის გათვალისწინებით, ბიზნეს პროცესების სრულფასოვნად ადმინისტრირების და სახელმწიფო ქონების მართვა/განკარგვასთან დაკავშირებული პროცესის გამარტივების მიზნით, მნიშვნელოვანია ელექტრონული პორტალის დანერგვა.

ელექტრონული პორტალის დანერგვის შედეგი იქნება:

დანერგილი ელექტრონული სერვისები;
სახელმწიფო სერვისების ხელმისაწვდომობა;
მაქსიმალურად სრულყოფილი მონაცემთა ბაზა;
დაზოგილი შრომითი რესურსი;
სააგენტოს გამარტივებული და გამჭირვალე საქმის წარმოების პროცესები;
სააგენტოს საქმიანობის ცნობადობის ამაღლება;
სააგენტოს შემოსავლების ზრდა.

სააგენტოს მიერ დადგინდა, რომ არ არსებობს კოორდინირებული მართვისათვის საჭირო ელექტრონული სისტემის ერთიანი პროგრამული პლატფორმა, სადაც სააგენტოს სტრუქტურული ერთეულები შეძლებენ მონაცემების ასახვას, დამუშავებას და საჭირო ინფორმაციის ოპერატიულად გენერირებას. ვინაიდან შესაძლებელი უნდა გახდეს ერთიანი მონაცემთა ბაზების შექმნა, ელექტრონული სერვისების დანერგვის ხელშეწყობა და პროცესების გამჭირვალობის უზრუნველყოფა, მნიშვნელოვანია ერთიანი ელექტრონული პორტალის შემუშავება და დანერგვა.

არსებული ბიზნეს პროცესებისა და პროგრამული უზრუნველყოფის მხარდაჭერის დღეისათვის არსებული მდგომარეობის შესწავლის საფუძველზე გამოვლინდა, რომ სააგენტოში არსებული ცალკეული პროგრამული პლატფორმების გამოყენება იწვევს მონაცემთა ფრაგმენტულ დამუშავებას, გართულებულია ინფორმაციის კოორდინირებულად გაცვლისა და გადამოწმების პროცესი (მექანიკური კონტროლის მრავალი მექანიზმის დამატებით გამოყენება), მონაცემების სანდოობის მაღალი ხარისხის უზრუნველსაყოფად იხარჯება თანამშრომელთა მოცულობითი დროის რესურსი. სხვადასხვა მმართველობითი ანგარიშების (Report) მოსამზადებლად ინფორმაციის დამუშავება, გადამოწმება და ასახვა ხორციელდება სტრუქტურული ქვედანაყოფების მიერ ინდივიდუალურად, მათ მიერვე შექმნილ ცალკეულ მონაცემთა ბაზებში, რომლებიც არ არიან სინქრონიზებული ერთიან სისტემასთან.

„საქართველოს მთავრობის შესაბამისი განკარგულების პროექტის მომზადება განპირობებულია სახელმწიფოს სტრატეგიული მიზნებიდან გამომდინარე, რადგან მაქსიმალურად ხელმისაწვდომი და გამჭვირვალე გახადოს სახელმწიფო ქონების მართვა/განკარგვასთან დაკავშირებული პროცესი. სააგენტოს საქმიანობის სპეციფიკის გათვალისწინებით, ასევე ბიზნეს პროცესების სრულფასოვნად ადმინისტრირების მიზნით, მნიშვნელოვანია ელექტრონული პლატფორმის დანერგვა, რათა გამარტივდეს სახელმწიფო ქონების მართვა/განკარგვასთან დაკავშირებული პროცესი. პორტალის არარსებობით გამოწვეული სირთულეები საბოლოოდ უარყოფითად მოქმედებს საზოგადოების იმ სეგმენტზე, რომელიც დაინტერესებულია სახელმწიფო ქონების პრივატიზებით. შესაბამისად სასიცოცხლოდ მნიშვნელოვანია პლატფორმის შექმნა უმოკლეს ვადაში“, - აღნიშნულია სახელმწიფო შესყიდვების სააგემტოს ვებგვერდზე გამარტივებული შესყიდვის შესახებ განთავსებულ ინფორმაციაში.