გამომძიებელ ჟურნალისტთა გაერთიანება „აი ფაქტმა“ გამოაქვეყნა ინფორმაცია ყოფილი პარლამენტარის გუგული მაღრაძის სიძის ბიზნეს საქმიანობის შესახებ. „აი ფაქტი“ წერს, რომ ყოფილი პარლამენტარის გუგული მაღრაძის ოჯახზე მისი პარლამენტარობა დადებითად აისახა. მისმა სიძემ ჯერ თბილისის მერიაში დაიწყო უკონკურსოდ მუშაობა, შემდეგ კი ისეთი ბიზნესი წამოიწყო, რომელსაც მთავრობა ყველანაირი სახელმწიფო რესურსით ეხმარებოდა. როგორც „აი ფაქტი“ წერს, გუგული მაღრაძე სიძესა და ქალიშვილთან ცხოვრობს.
ყოფილი პარლამენტარის სიძე, ირაკლი ღურჭუმელია ჩაის კომპანია „მანნას” თანადამფუძნებელი და დირექტორია. კომპანიამ ჩაის წარმოება 2017 წლის შემოდგომაზე სოფლის მეურნეობის სამინისტროს მხარდაჭერით დაიწყო: მიიღო 348,000-ლარიანი გრანტი და 436,000-ლარიანი შეღავათიანი აგროკრედიტი.
კომპანიას სახელმწიფო პროგრამა „აწარმოე საქართველოში“ და სოფლის მეურნეობის სამინისტრო დაეხმარა, რომ პროდუქტი უცხოური ბაზრებისთვის გაეცნო. წარმოების დაწყებისთანავე „მანნა“ საზღვარგარეთ გამართულ გამოფენებზე მოხვდა. 2020 წელს „მანნა“ საქართველოდან ჩაის ექსპორტიორთა ათეულში იყო“.
პორტალი წერს, რომ სახელმწიფო რესურსების გარდა, „მანნამ” ბრენდის ჩამოყალიბება-განვითარებისა და მარკეტინგული პროცესების მართვისთვის usaid/reap ფინანსური დახმარებაც მიიღო. 2020 წელს კომპანიის 49%-ის მფლობელი გახდა ახალი ფონდი – „გაზელ ფაინენს ჯორჯია“ ფონდმა „მანნას“ განვითარებაში 600,000 დოლარი დააბანდა. ოფიციალური განცხადებების თანახმად, „გაზელ ფაინანსი“ საქართველოში საპარტნიორო ფონდმა მცირე და საშუალო ბიზნესის განვითარებისთვის შემოიყვანა. არადა, საპარტნიორო ფონდი, რამდენიმე შუამავალი კომპანიის გავლით, „გაზელ ფაინანს ჯორჯიას“ 29.11%-ს ფლობს.
„იმ ფონზე, როცა „მანნას” მთავრობისგან არაერთი დახმარება თუ ფინანსური ინვესტიცია ერგო, ყოფილმა პარლამენტარმა და “ქართული ოცნების” წევრმა, გუგული მაღრაძემ არ ჩათვალა საჭიროდ, 10 შევსებული დეკლარაციიდან რომელიმეში მაინც მიეთითებინა, რომ სიძესა და ქალიშვილთან ერთად ცხოვრობს“, - წერს „აი ფაქტი“.
ჟურნალისტურ გამოძიებაში აღნიშნულია, რომ ღურჭუმელიას ბიზნეს პარტნიორ დევი დუნდუას „ქართული ოცნებისთვის“ 120,000 ლარი აქვს შეწირული, თავად გუგული მაღრაძეს - 50 ათასი ლარი.