რუსეთის მიერ დანიშნული ადგილობრივი ხელისუფლების მოხელემ ქალაქ ენერგოდარში, რომელშიც მდებარეობს ზაპოროჟიეს ატომური ელექტროსადგური, 4 სექტემბერს რუსეთის მედიას უთხრა, რომ რეგიონში არ ყოფილა ახალი სროლა, თუმცა შესაძლო ეკოლოგიური კატასტროფის შიში კვლავაც დიდია.

როგორც ატომური ენერგიის საერთაშორისო სააგენტოს (IAEA) გენერალურმა დირექტორმა რაფაელ გროსიმ თქვა 3 სექტემბერს, რუსეთის კონტროლქვეშ მყოფ აეს-ში ჩასულმა IAEA-ის ექსპერტებმა თქვეს, რომ ელექტროგადაცემის მეოთხე და უკანასკნელი ხაზი მწყობრიდანაა გამოსული. სადგური უკრაინის ელექტროგადამცემ სისტემას კვლავაც აწვდიდა ელექტროენერგიას სარეზერვო ხაზის მეშვეობით, რომელიც საგანგებო ვითარების შემთხვევაში ასევე შეიძლება გამოყენებულ იქნეს ელექტროსადგურის მომარაგების სარეზერვო წყაროდ.

რუსეთმა უკრაინას დასდო ბრალი სადგურის ძალით კვლავ დაბრუნების მცდელობაში, მაგრამ კიევი უარყოფს ამ ბრალდებებს.

უკრაინა და დასავლეთი რუსეთს ბრალს სდებენ აეს-ის ტერიტორიაზე მძიმე შეიარაღების განლაგებაში იმის იმედით, რომ უკრაინა ცეცხლს არ გაუხსნის მას.

მოსკოვი უარყოფს ამ ბრალდებებს, მაგრამ ეწინააღმდეგება ეკოლოგიური კატასტროფის თავიდან აცილების მიზნით რეგიონის დემილიტარიზაციის მცდელობებს.

მიმდინარე თვის დასაწყისში უკრაინამ კონტრიერიში დაიწყო ქვეყნის სამხრეთში, განსაკუთრებით - ხერსონის ოლქში, რომელიც მოსკოვმა ჩაიგდო ხელში თებერვალში დაწყებული შეჭრის შემდეგ.

იტყობინებიან, რომ ღამით რუსეთმა ცეცხლი გაუხსნა საპორტო ქალაქ ნიკოლაევს უკრაინის სამხრეთში, განაცხადა ქალაქის მერმა 4 სექტემბერს.

წყარო: radiotavisupleba.ge